கிருஷ்ணா.. கிருஷ்ணா…

அவர் ஒரு வடநாட்டு பக்தர். கிருஷ்ண பகவானையே தனது வழிபடு கடவுளாகக் கொண்டிருப்பவர். எப்போதும் கிருஷ்ண நாமத்தையே சொல்லிக் கொண்டிருக்கும் அவர், முதன் முறையாக ரமணாச்ரமம் வந்திருந்தார். ஆச்ரமத்திலேயே தங்கிக் கொள்ள அவருக்கு அனுமதி அளிக்கப்பட்டிருந்தது.

தினந்தோறும் காலை பகவான் கட்டிலில் சும்மா அமர்ந்திருப்பதும் அவரைச் சுற்றி அமர்ந்திருப்பவர்கள் எல்லாம் பாடுவதும், மந்திரங்கள் கூறுவதுமாக இருந்த நிலை, அந்த வடநாட்டு பக்தருக்கு மிகுந்த ஆச்சரியமாக இருந்தது. “என்ன இது! இவர் ஏன் சும்மாவே அமர்ந்திருக்கிறார்! எல்லாரும் ஏதேதோ சொல்லிக் கொண்டிருக்கிறார்கள். இவர் எதையும் பார்ப்பது மாதிரியோ, கேட்பது மாதிரியோ தெரியவில்லையே. எங்கோ பார்த்துக் கொண்டல்லவா அமர்ந்திருக்கிறார். பஜனை, ஆரத்தி என்று எதுவுமே இல்லையே!” என்றார் அருகில் இருந்த டங்கன் க்ரீன்லீஸ் என்ற வெளிநாட்டு பக்தரிடம்.

டங்கன் அவரிடம், “பகவானின் நிலை நமது சிந்தனைக்கு அப்பாற்பட்டது. அவ்வளவு சீக்கிரம் புரிந்து விடாது. தொடர்ந்து பகவானை வந்து தரிசியுங்கள். உங்களுக்குப் புரியும்” என்றார்.

பக்தரோ, “என்னமோ.. எனக்குத் திருப்தியா இல்ல. இங்க வந்ததுக்குப் பதிலா ப்ருந்தாவனம் போயிருக்கலாம். அங்கே க்ருஷ்ணன் இருக்கான். நிறைய பக்தர்கள் வருவாங்க. ஆடிப் பாடி பஜனை பண்ணி அவனை வணங்கற திருப்தியும் சந்தோஷமும் இங்க இல்ல. பக்தியோட ரசம் அதை அனுபவிச்சங்களுக்குத் தான் புரியும். நீங்க வெளிநாட்டுக்காரர் உங்களுக்கு அதெல்லாம் எதுவும் புரியாது” என்றார்.

டங்கனும் புன்சிரிப்புடன் பதில் பேசாமல் மௌனமானார்.

அந்த வடநாட்டு பக்தர் தொடர்ந்து ஆசிரமத்திலேயே தங்கி இருந்தார். உணவு உண்பதற்கு மட்டும் சமையல் கூடத்திற்குச் செல்வார். பகவானை தரிசிக்காமல் அறைக்குத் திரும்பி விடுவார். இப்படியே இது தொடர்ந்து கொண்டிருந்தது.

சில நாட்கள் சென்றன.

“இனிமேல் இங்கிருப்பதில் பயனில்லை. ஊருக்குக் கிளம்ப வேண்டியதுதான்” என்று முடிவு செய்தார் அந்த பக்தர். அதற்கான ஆயத்தப் பணிகளை மேற்கொண்டார். நண்பரிடம் “நான் உங்க பகவான் கிட்டேயிருந்து தப்பிச்சுட்டேன். நேரே இப்போ பிருந்தாவனம் தான் போகப் போறேன். ஆகா, அதை நினைக்கவே ஆனந்தமா இருக்கு” என்றார் உற்சாகத்துடன்.

டங்கன் அவரிடம், “பகவானைப் பத்தி நீங்கள் என்ன நினைத்தாலும் சரி, அவரிடம் சொல்லாமல் ஊருக்குக் கிளம்புவது எனக்குச் சரியாகப் படவில்லை. அவரோட விருந்தினராத்தான் நாம இங்க、தங்கியிருக்கோம். அதனால போகும்போது ஒரு வார்த்தை சொல்லிட்டு போறதுதான் மரியாதை” என்றார்.

வடநாட்டு பக்தருக்கும் அவர் சொல்வதில் இருக்கும் நியாயம் புரிந்தது.

மறுநாள் நாள் மாலைநேரம். அவர் கிளம்பும் வேலை வந்தது. பகவானிடம் விடை பெறுவதற்கேற்றவாறு மரியாதை நிமித்தமாக கையில் ஆரஞ்சுப் பழங்கள் அடங்கிய ஒரு கூடையுடன் அவர் ஹாலுக்கு வந்தார்.

அப்போது பகவானும் அங்கிருந்து மாலை உலா புறப்படுவதற்காக வெளியே வந்தார்.

ramanan

பக்தரின் அருகே வந்தவர், ஒரு நிமிடம் அவரை உற்று நோக்கியபடி அங்கேயே நின்றார்.

பக்தரும் பகவானை நேருக்கு நேராகப் பார்த்தார். பகவானின் சுடர் விடும் கண்களையே பார்த்துக் கொண்டிருந்தவர், “கிருஷ்ணா.. கிருஷ்ணா..” என்று கத்தியபடியே அப்படியே வேரற்ற மரம் போல் கீழே விழுந்தார். அவர் கையிலிருந்த பழங்கள் உருண்டோடின. யாருக்கும் ஒன்றும் புரியவில்லை. அவரோ “கிருஷ்ணா.. கிருஷ்ணா. ஐயோ உன்னைப் புரிஞ்சிக்காமப் போயிட்டேனே. உன்னைப் போய் திட்டினேனே” என்று கண்களில் கண்ணீர் பெருகக் கதறிக் கொண்டிருந்தார்.

பகவானோ “சரி சரி போ!” என்று சொல்லிவிட்டு மலையை நோக்கி நடந்து சென்று விட்டார்.

அருகில் உள்ளவர்கள் அந்த பக்தரைக் கைத்தாங்கலாகத் தூக்கினர். அவர் பயணம் செய்வதற்குத் தயாராக குதிரை வண்டியும் வந்து நின்றது. அப்போது அங்கே வந்த டங்கன் க்ரீன்லீஸைப் பார்த்தவுடன் அந்த பக்தர், “என் கிருஷ்ணனைப் பாத்துட்டேன். இது போதும். என் ஜென்மத்துக்கு இது போதும். மீரா ஏன் இவ்வளவு பிரியமா இருக்கான்னு இப்போ எனக்கு புரிஞ்சுடுச்சு. வாழ்க்கையோட பலன் கிடைச்சுடுச்சு. கிருஷ்ண தரிசனம் வேணும்னு ஏக்கத்தோட இங்க வந்தேன். அந்த தரிசனம் எனக்குக் கிடைச்சுடுச்சு. இப்போ நான் நிம்மதியா ஊருக்குப் போறேன்” என்று சொல்லி, உணர்ச்சிப் பெருக்குடன் கண்கலங்கியவாறே விடைபெற்றார்.

அதைக் கேட்ட டங்கன் க்ரீன்லீஸ், தன் வாழ்க்கையில் முதன் முறையாக பக்தியால் கண்ணீர் விட்டு அழுதார்.

ஸர்வம் கிருஷ்ண மயம் ஜகத்!

ஓம் நமோ பகவதே ஸ்ரீ ரமணாய!

கிரிவலம் வருவோமா?

திருவண்ணா மலை கிரிவலம்

மலைமேல் இருந்து அருணாசலர் ஆலயம்

கார்த்திகை தீபப் பெருநாள் அன்றுதான் திருவண்ணாமலை திருத்தலத்தில் இறைவன் இறைவிக்கு இடப்பாகம் அளித்து அர்த்தநாரீஸ்வரர் ஆகக் காட்சி அளித்தான். அந்த நன்னாளில் மலைவலம் வருவது மகத்தான புண்ணியத்தைத் தரும். குறிப்பாக திருவண்ணாமலை கிரிவலம் அனைத்துப் பாவங்களையும் போக்கி மகத்தான புண்ணிய பலனைத் தரவல்லது. கிரிவலம் பற்றிய தகவல்கள் சிலவற்றைப் பார்ப்போம்.

திருமஞ்சன கோபுரம்

மலையின் பெருமை

இம்மலை பிறப்பு, இறப்பினை நீக்க கூடியது. ஆதலால் மலைமருந்து என்றும், சிகப்பு நிறம் உடையதால் அருணாகிரி என்றும் அழைக்கப்படுகிறது. இங்கு மலையே இலிங்க வடிவாக இருப்பதால் இம்மலையைச் சுற்றுவது இறைவனையே சுற்றி வருவதற்கு சமாகக் கருதப்படுகிறது.

சீல முனிவோர்கள் செறியு மலை..

சிந்திப்பார் முன் நின்று முக்தி வழங்கு மலை..

ஞான நெறி காட்டு மலை..

ஞான முனிவோர்கள் நித்தம் நாடு மலை..

– என்றெல்லாம் அண்ணாமலை வெண்பாவில் குரு நமசியாவர் இம்மலையைப் போற்றுகிறார்.

ராஜ கோபுரம்

கிருத யுகத்தில் நெருப்பு மலையாகவும், திரேதாயுகத்தில் மாணிக்க மலையாகவும், துவாபரயுகத்தில் பொன்மலையாகவும், கலியுகத்தில் கல் மலையாகவும் திருவுருவம் கொண்டுள்ளது அண்ணாமலை. இத்தலத்தைச் சுற்றி 1008 லிங்கங்கள் புதைந்திருப்பதாகச் சொல்லப்படுகிறது.

கிரிவலம்

இம்மலையின் சுற்றளவு 14 கி.மீ. கிரிவலத்தை எங்காவது துவங்கி, எப்படியாவது முடித்தல் கூடாது. அதன் பெயர் கிரிவலமும் அல்ல. முதலில் ஆலயத்தின் புறத்தே இருக்கும் பூத நாராயணரிடம் மலையைச் சுற்றுவதற்கு அனுமதி வாங்கிக் கொள்ள வேண்டும். அவர் தான் இம்மலையைக் காவல் காக்கிறார். அதன் பின் விக்னங்கள் ஏதும் இல்லாமல் சிறப்பாய் மலை வலம் முடிய வேண்டும் என்று வழியில் உள்ள இரட்டைப் பிள்ளையாரை வணங்கி வேண்டிக் கொள்ள வேண்டும். பின்னர் ஆலயம் சென்று அண்ணாமலையாரையும், உண்ணாமுலை அம்மனையும் தரிசனம் செய்தல் வேண்டும். அதன் பின் வெளியில் வந்து ராஜ கோபுரத்தை வணங்கி விட்டு மலை வலத்தை ஆரம்பிக்க வேண்டும்.

நந்திகேஸ்வரர்

மலையின் எட்டு திசைகளிலும் தன் பாவங்களை போக்க்கிக் கொள்வதற்காக வழிபட்ட அஷ்டதிக்கு பாலகர்களில், கிழக்கிற்கு அதிபதியான இந்திரன் வழிபட்ட இந்திரலிங்கத்தை முதலில் வழிபடவேண்டும். மலை சுற்றும் சாலையில் உள்ள நந்திகேசுவரர் சன்னதியை வணங்கி வழிபட்டு பின்னர் தான் மலைவலம் வர வேண்டும். தென்கிழக்கு திசைக்கு அதிபதியான அக்னி பூஜை செய்த அக்னி லிங்கம் உள்ளது.  இதன் அருகில் சிம்ம தீர்த்தம் உள்ளது.

வழியில் உள்ள சத்குரு சேஷாத்ரி சுவாமிகள் ஆசிரமம் மகத்தான மந்திர சக்தி வாய்ந்தது. கேட்ட வரத்தைத் தர வல்லது. இங்கு கிட்டத்தட்ட 22க்கு மேற்பட்ட மகான்கள் ஜீவ சமாதியில் உள்ளனர். வழிபடுதல் சிறப்பு. தொடர்ந்து ரமணாஸ்ரமம் ஆன்ம அமைதியைத் தர வல்லது. சற்றுத் தொலைவில் விசிறி சாமியார் ஆசிரமம் அமைந்துள்ளது. மன அமைதியைத் தர வல்லது. தியானம் செய்ய ஏற்ற இடம் அது.

அடுத்து வழியில் தெற்கு திசைக்கு அதிபதியான எமன் பூஜை செய்து வழிப்பட்ட எமலிங்கம் உள்ளது.  எமன் கட்டளை நிறைவேற்றும் கின்னரர் முதலானோர் இங்கிருந்து தான் புறப்பட்டு செல்லுகின்றனர் என்பது நம்பிக்கை.

அண்ணாமலை

அடுத்து தென்மேற்கு திசைக்கு அதிபதியான நிருதி, சிவனை வழிப்பட்ட நிருதி லிங்கம் உள்ளது. இங்கு வணங்கிய பின்பு தெற்கிலிருந்து மேற்கில் திரும்பும் வளைவில் நின்று மலையை தரிசிக்க வேண்டும். இந்த இடம் பார்வதி தேவிக்கு ரிஷப வாகனத்தில் சிவபெருமான காட்சி அளித்த இடம் ஆகும். ஆதலால் இங்கு மலையின் முகப்பில் தெரியும் நந்தியின் தலையை வணங்கிச் செல்ல வேண்டும். அடுத்து அருணாசலேஸ்வரின் கோயிலுக்கு நேர் எதிரில் திருநேர் அண்ணாமலை கோயில் உண்டு. இங்கு உண்ணாமுலை அம்மன் தீர்த்தம் அருகிலேயே உள்ளது. அதனை வழிபட வேண்டும். வழியில் அடிமுடி சித்தர் ஜீவ சமாதி இருக்கும். இங்கு தியானம் செய்தால் மகத்தான புண்ணிய பலன்கள் கிடைக்கும்.

நந்தி

அடுத்து சூரியன் வழிபட்ட லிங்கம். மேற்கு திசைக்கு அதிபரான வருணன் வழிபட்ட வருண லிங்கம் ஆகியவை உள்ளது. அதனை வழிபட்ட பிறகு பிரம்மன் வழிபாடு செய்து பாவங்களை போக்கி கொண்ட ஆதி அருணாசலேஸ்வரர் கோயில் உள்ளது. இந்த கோயிலை அடி அண்ணாமலையார் என்று அழைப்பர். இங்கு அவசியம் தரிசனம் செய்தல் வேண்டும். இது மாணிக்கவாசகர் திருவெம்பாவை அருளிய இடம். இவ்வாலயம் செல்லும் வழியில் மாணிக்கவாசகரின் ஆலயம் உள்ளது.

ஆதி அண்ணாமலை

அதற்கடுத்து வடமேற்கு திசைக்கு அதிபதியான வாயுலிங்கம் உள்ளது. சிறிது தூரம் சென்றால் வட திசைக்கு அதிபதியான குபேரன் வழிபட்ட குபேர லிங்கம் காணப்படும். அடுத்து இடுக்குப் பிள்ளையார் கோயில் உள்ளது. இங்கிருந்து மலையை பார்த்தால் ஐந்து முகங்கள் தெரியும். இது சிவனின் ஐந்து திருமுகங்களை குறிக்கக்கூடியது. இதனை பஞ்ச முக தரிசனம் என்பர். அடுத்து மலை வல பாதையில் இருந்து சுடுகாட்டுக்கு பிரியும் தனிப் பாதையில் சென்றால் வட கிழக்கு அதிபரான ஈசானன் வழிபட்ட ஈசான லிங்கம் உள்ளது. இதனையும் வழிபட்டு, வழியில் உள்ள ஈசான்ய மடத்தில் ஜீவ சமாதியாக உள்ள ஈசான்ய ஞான தேசிகரையும் வணங்க வேண்டும். அதனை அடுத்து எதிரே ஒரு சிறிய விருஷபாரூடர் சன்னதி இருக்கும். அதை அவசியம் வணங்க வேண்டும். ஏன் என்றால் அந்த இடத்தில்தான் உமையம்மைக்கு சிவன் காட்சி அளித்து இடப்பாகம் தந்தருளினான். ஆதலால் அதையும் தரிசித்தல் மிக மிக முக்கியமானது. அதன் பிறகு மீண்டும் பூதநாராயணர் ஆலயம் அடைந்து அவருக்கு நன்றி கூறி, தீபம் ஏற்றி வழிபட்டு, வழித்துணையாக விக்னங்கள் இல்லாமல் காத்த இரட்டைப் பிள்ளையாரையும் வணங்கி வழிபட்டு, பின் அருணாசலேஸ்வரர் ஆலயம் சென்று தரிசித்த பிறகுதான் மலைவலம் முழுமையாகப் பூரணத்துவம் அடைகிறது.

சிறப்பு விமான தரிசனம்

கிரிவலம் செல்லும் முறை

நடந்துதான் செல்ல வேண்டும். வாகனங்களில் செல்லுதல் கூடாது. இடமிருந்து வலமாக மட்டுமே சுற்ற வேண்டும். இடப்புறமாகவே நடந்து செல்ல வேண்டும். மலை சுற்றும் போது கைகளை வீசிக்கொண்டும், பேசிக்கொண்டும் நடக்கக் கூடாது. நமச்சிவாய நாமத்தை உச்சரித்துக்கொண்டே நடந்து செல்லல் வேண்டும். அங்கும் ஆடிக் கொண்டும், பாடி, ஓடிக் கொண்டும் செல்லக் கூடாது. அமைதியாலவே செல்ல வேண்டும்.

திரிமூர்த்தி தரிசனம்

மலை வலம் வர உகந்த நாட்கள்:
எல்லா மாதங்களும் கிரி வலத்திற்கு ஏற்ற மாதங்களே! இருந்த போதும் ஐப்பசி, கார்த்திகை, மார்கழி, பௌர்ணமி காலங்கள் மலை வலத்திற்கு ஏற்ற காலங்களும், மாதங்களும் ஆகும். ஏகாதசி, நீத்தார் நினைவு நாள்களிலும் கிரிவலம் வரலாம். அமாவாசை, பிறந்த நாள், திருமண நாள், பிரதோஷம், சிவராத்திரி போன்ற புண்ணிய தினங்களிலும் மலை வலம் வரலாம்.

கிரிவல மகிமை

புராண காலத்தில் பார்வதி தேவியார் சிவனின் இடப்பாகம் பெற வேண்டும் என்பதற்காக கார்த்திகை மாதத்தில் கிருத்திகை நட்சத்திரத்தில் தன் பரிவாரங்களூடன் மலையை வலம் வந்தார். அப்போது சிவன் காட்சி தந்து உமையாளுக்கு இடப்பாகம் அளித்தார் என்பது வரலாறு. சித்தர்கள், ஞானிகள் ஆகியோர் ஒவ்வொரு மாதப்பிறப்பு மற்றும் பிரதோஷ காலத்தில் மலை வலம் வந்தனர். இன்றும் சூட்சும ரீதியாக வந்து கொண்டிருக்கின்றனர்.

சந்திரன் நம் மனத்துக்கு (எண்ணத்திற்கும்) காரகன். பௌரணமியன்று பூமியில் சூரியனிடமிருந்து சக்திகளை அதிகளவில் கிரகித்து பூர்ண நிலவாக, அதிகக் கலைகள் கொண்டவனாக சந்திரன் விளங்குகிறான். இதனால் பௌர்ணமி மலை வலம் வருவது சாலச்சிறந்தது என பெரியோர்களால் போற்றப்பட்டது.

நந்தி முக தரிசனம்

சிவன் கோயில்கள் அனைத்திலும் சிறப்பு வழிபாடு திங்கள்கிழமையாக இருக்கும். சோமவாரம், சோமப் பிரதிஷணம் போன்றவற்றின் மூலம் நாம் இந்த உண்மையை அறிந்து கொள்ளலாம். ஆனால், திரு அண்ணாமலை அக்னி மலை. அக்னிக்குரிய நாள்  செவ்வாய்கிழமை. அக்னிக்குரிய கிரகம் அங்காரன். ஆகவே இந்தக் கோயிலில் மட்டுமே சிவபெருமானுக்கு செவ்வாய்கிழமை அன்று தான் விசேஷ வழிபாடு நடக்கின்றது. செவ்வாய் கிழமை அன்று வழிபடுவோர் பிறவிப் பிணியிலிருந்து விடுபடலாம் என்று புராணங்கள் கூறுகின்றன. சத்குரு சேஷாத்ரி சுவாமிகளும் செவ்வாயன்று மலை வலம் வருதலை மிகச் சிறப்பாகக் கூறியுள்ளார்.

பலன்கள்

ஊழ்வினைகளை நீக்கக்கூடியது அண்ணாமலையார் கோயில். பிறவிப்பிணி நீங்க வேண்டும் என விரும்பும் எவரும் மலை வலம் வருவதால் தத்தம் கர்மாவை குறைத்து கொள்ள முடியும்.

அண்ணாமலை தொழுவார் வினை வழுவா வண்ணம் அறுமே! -என்கிறது தேவாரமும்.

மலை சுற்றி வரவேண்டும் என நினைத்து ஓரடி எடுத்து வைப்பவர்களுக்கு ஒரு யாகம் செய்த பலன் கிடைக்கும். இரண்டாம் அடி எடுத்து வைத்தால் ராஜ சூர்ய யாகம் செய்த பலன் கிடைக்கும் மூன்றடி எடுத்து வைத்தால் அசுவமேத யாகம் செய்த பலன் கிடைக்கும். நான்காவது அடி எடுத்து வைத்தால் எல்லா யாகங்களும் பலன் கிடைக்கும். மலையைப் பற்றியும், மலை சுற்றுவதைப் பற்றியும் நினைப்பவர்களுக்கே இந்தப் பலன் என்றால், மலை சுற்றுபவர்களுக்கு கிடைக்கும் பலன்…??? அவர்கள், கைலாசத்திற்குள் நுழைந்து பிறப்பு இறப்பாகிய பிணி நீங்கி, மோட்சமாகிய உயர் பதவியை அடைவார்கள் என்று அருணாசல புராணம் தெரிவிக்கின்றது.

பூத நாராயணர்

ஞாயிற்றுக் கிழமை சுற்றினால் சிவபதவி கிடைக்கும்
திங்கட்கிழமை சுற்றினால் இந்திர பதவி கிடைக்கும்.
செவ்வாய்க்கிழமை சுற்றினால் கடன்,வறுமை நீங்கும்.
புதன்கிழமை சுற்றினால் கலைகளில் தேர்ச்சி, முக்தி கிடைக்கும்.
வியாழக்கிழமை சுற்றினால் ஞானிகளாவார்கள்.

வெள்ளிக்கிழமை சுற்றினால் விஷ்ணு பதம் அடையலாம்.
சனிக்கிழமை சுற்றினால் நவக்கிரக தோஷம் நீங்கும்.

நாற்பத்தெட்டு நாட்கள் அதிகாலையில் கணவனும், மனைவியும் நீராடி மலைவலம் வந்தால் மகப்பேறு கிடைக்கும். கர்ம வினைகள் அனைத்தும் தொலையும். அமாவாசை அன்று சுற்றினால் மனதில் உள்ள கவலைகள் போகும். மனம் நிம்மதி அடையும். பாவங்கள் அனைத்தும் நீங்கும். பித்ரு தோஷங்கள் நிவர்த்தியாகும்.

ஆகவே, மலை வலம் வருவோம். மன நலம் பெறுவோம்.

மலை தரிசனம்

அருணாசல அருணாசல அருணாசல