ஜோதிடம் நமக்குத் தெரியும், அது என்ன நாடிஜோதிடம்?…

பொதுவாக, ‘நாடி ஜோதிடம்’ என்பதற்கு, நாடி ஜோதிட நிலையத்திற்கு நாடி வருபவர்களுடைய ஒலையினைத் தேடி எடுத்து, அவரவர்களுக்குரிய பலாபலன்களைக் கூறுவது என்பது பொருள். அதாவது நாடி ஜோதிடம் பார்க்க விரும்பும் ஒருவரது கைப் பெருவிரல் ரேகையினைக் கொண்டு, அவருக்கான சுவடியைத் தேடி எடுத்து அதன்மூலம் எதிர்கால வாழ்க்கையினைப் பற்றிக் கூறுவதே ‘நாடி ஜோதிடம்’ எனப்படுகிறது . ஒரு மனிதனின் (ஆண் என்றால் வலது கைப்பெரு விரல். பெண்ணாக இருப்பின் இடது கைப்பெரு விரல்) ரேகையினைக் கொண்டு பழங்கால ஔலைச்சுவடிகள் மூலம் ஆராய்ந்து நாடிஜோதிடர்கள் பலன்களைக் கூறி வருகின்றனர்.

இந்த நாடியில் அகத்தியர் நாடி, சுகர் நாடி, பிருகு நாடி, காக புஜண்டர் நாடி, சிவவாக்கியர் நாடி, நந்தி நாடி, வசிஷ்டர் நாடி, கெளசிகர் நாடி, சிவநாடி, விசுவாமித்திரர் நாடி, திருமூலர் நாடி, சுகர் மார்க்கேண்டயர் நாடி, அத்திரி நாடி, சப்த ரிஷி நாடி என்று பலவகை நாடிகள் காணக் கிடைக்கின்றன.

உண்மையில் நாடி என்பது என்ன?

நாடிஜோதிட ஓலைச்சுவடிகள்

இன்னின்ன கைப்பெருவிரல் ரேகை அமைப்பினை உடையவர்களின் எதிர்காலம் இவ்வாறு தான் இருக்கும் என்பதனை, சில நுணுக்கமான கணிதமுறைகள் மூலம் அக்கால முனிவர்கள்  ஆராய்ந்து, அக்குறிப்புகளை ஓலைச் சுவடிகளில் எழுதி வைத்தனர் என்றும், அதுவே இன்று தலைதலைமுறையாகப் பாதுகாக்கப்பட்டு நமக்குக் கிடைத்துள்ளது என்றும் நாடி ஜோதிடர்கள் கூறுகின்றனர்.

நாடி ஜோதிடம் – காண்டம் பற்றிய விவரங்கள்

பொதுவாக நாடியில் மொத்தம் பன்னிரண்டு காண்டங்கள் உள்ளன. அவற்றின் மூலம் நமது எதிர்காலப் பலன்களை துல்லியமாக அறிந்து கொள்ளலாம் என்று கூறப்படுகிறது. ஆனால் அவற்றை அறிய, முதலில், முதல் காண்டமான பொதுக்காண்டத்தினைப் பார்க்க வேண்டும் என்றும், அதில் ஒருவரைப் பற்றிய பொதுவான செய்திகள் காணப்படும் என்றும் கூறப்படுகிறது. அதாவது ஒருவரது பெயர், தொழில், மற்றும் குடும்ப விபரங்கள் போன்ற பொதுவான விஷயங்கள் பொதுக் காண்டத்தில் காணப்படும். திருமணம், குழந்தைகள், கல்வி, வேலைவாய்ப்பு, தொழில், வழிபாடு போன்ற விரிவான பலன்களை அறிய அததற்கென உள்ள தனித்தனிக் காண்டங்களைப் பார்க்கவேண்டும் என்று வலியுறுத்தப்படுகிறது.

ஒரு மனிதனின் பிறப்பு முதல் ஆயுள் வரையிலான பொதுவான பலன்களை பொதுக் காண்டத்தின் மூலம் அறிந்து கொள்ளலாம். அதாவது ஜாதகர் பெயர், பெற்றோர் பெயர், சகோதரர்கள் விபரம், தொழில், திருமணம், நோய், கடன், பயணங்கள், சொத்து சேர்க்கை, எதிரிகள் தொல்லை போன்ற பொதுவான தகவல்கள் அதில் காணப்படும்.  இரண்டாவது காண்டம் மூலம் பணம், தவ வரவு, வாக்கு வன்மை, வாக்குப் பலிதம், கண் சம்பந்தமான நோய்கள் பற்றி அறிந்து கொள்ளலாம். மூன்றாவது காண்டம் சகோதரர் உதவி, ஜாதகரின் தைரியம், வீரம், வலிமை வெற்றி பற்றிக் கூறும். நான்காவது காண்டம் தாயாரின் உடல் நலம் பற்றிக் கூறும். ஐந்தாவது காண்டம் மூலம் பூர்வ புண்ணியம்பற்றி, புத்திரன் பற்றி அறிந்து கொள்ளலாம்.

ஆறாவது காண்டம் ருணம், நோய், கடன் பற்றியும், ஏழாவது களத்திரம் பற்றியும், எட்டாவது ஆயுள், கூட்டு பற்றியும், ஒன்பதாவது காண்டம் தெய்வ அருள், கர்மச் செயல்கள் பற்றியும் கூறும். மேலும்  தந்தை நலம், செல்வம், யோகம், ஆலய தரிசனம், குரு உபதேசம், இறைப் பணி பற்றியும் அதன் மூலம் அறிந்து கொள்ளலாம். பத்தாவது காண்டம் வேல, தொழில் பற்றியும், பதினோராவது காண்டம் லாபம் பற்றியும், பனிரெண்டாவது காண்டம் மறுபிறவி, வெளிநாட்டு யோகம், அதனால் ஏற்படும் நன்மை, தீமைகள், அரசாங்கத் தொடர்புகள் பற்றி விளக்குவதாகும்.

இதுதவிர சாந்தி காண்டம், தீட்சை காண்டம், ஔஷத காண்டம், எல்லைக் காண்டம், அரசியல் காண்டம், பிரச்சன்ன காண்டம், மந்திர காண்டம், துல்லிய காண்டம், தசாபுக்தி காண்டம் என பல காண்டங்கள் உள்ளதாக நாடி ஜோதிடர்கள் கூறுகின்றனர்.

சரி, நாடி ஜோதிடம் எப்படிப் பார்க்கிறார்கள்?…

சுவடிக் கட்டு

நாடி ஜோதிடர்கள், தங்கள் நிலையத்தினை நாடி வரும் நபர்களுடைய கைப் பெருவிரல் ரேகையினை (ஆண் என்றால் வலது கைப்பெரு விரல் ரேகை. பெண்ணாக இருப்பின் இடது கைப்பெரு விரல் ரேகை), முதலில் ஒரு தாளில் பதிந்து கொள்கிறார்கள். பின்னர் அதற்கான ஓலையைத் தேடி எடுக்கின்றனர். ஓலை உடனே கிடைத்து விடும். சிலருக்கு ஓரிரு நாள் ஆகலாம். சிலருக்கு ஓலை கையிருப்பில் இல்லை என்றால் வேறு நிலையத்திலிருந்து தான் தேடி எடுக்க வேண்டும் என்பதால் ஓரிரு மாதங்கள் கூட ஆகலாம்.

சுவடி கிடைத்ததும் அது அந்நபருக்குரிய ஓலை தானா என்பதனை அறிய நாடிஜோதிடர் வந்திருப்பவரிடம் பல கேள்விகளைக் கேட்பார். அதற்கு ஜோதிடம் பார்ப்பவர் ’ஆம்’, அல்லது  ’இல்லை’ என்று மட்டும் பதில் கூறினால் போதுமாம்.

பொதுவாக கீழ்கண்டது போன்று கேள்விகள் அமைகின்றன.

உங்களுக்குத் திருமணம் ஆகி விட்டதா?

உங்களுக்குக் காதல் திருமணமா?

முதல் குழந்தை பெண்தானா?

தந்தையின் பெயர் சிவனைக் குறிப்பதாக இருக்குமா?

மனைவி/ கணவனின் பெயரில் மலரின் பெயர் வருமா?

இவை பொதுவான கேள்விகள் மட்டுமே. ஆளுக்கு ஆள், ஓலைக்கு ஓலை இவ்வகைக் கேள்விகள் மாறுபடலாம் என்றும் கூறுகின்றனர். மேலும் இத்தகைய கேள்விகள் மூலம் சரியான மூல ஓலையைக் கண்டறிந்து அதன் மூலம் விரிவான பலன்களைத் தங்களால் கூற முடிவதாக ஜோதிடர்கள் தெரிவிக்கின்றனர்.

ஆமாம், எப்படிப் பலன்கள் கூறுகின்றனர்?

நம்மைப் பற்றி, நம் குடும்பம், வாழ்க்கை முறை, பெயர் என்று எல்லாவற்றையும் எத்தனையோ ஆண்டுகளுக்கு முன்னால் வாழ்ந்த முனிவர்கள் ஓலைச்சுவடிகளில் எழுதி வைத்திருக்கிறார்கள் என்பது உண்மைதானா? அதற்கு ஆதாரம்….???

(தொடரும்)

நன்றி:
நாடி ஜோதிடம் உண்மையா? பொய்யா?
மேகதூதன் பதிப்பகம்,
7/13, சின்னப்ப ராவுத்தர் தெரு,
ரத்னா கஃபே பின்புறம்,                                                                                       திருவல்லிக்கேணி, சென்னை-5
(பக்கம்:224, விலை: ரூ70 )
044-42155831

ஜோதிடம் உண்மைதானா?
வானவியல் சாஸ்திரப்படியும், ஜோதிடவியல்படியும், கணிதம் மற்றும் புள்ளியியல் முறைப்படியும் ஜோதிட சாஸ்திரத்தை ஓர் உண்மையான கலையாகக்  கருதலாம். ஆனால்  அறிவியல் முறைப்படி அதனை உண்மை என்று நிரூபிக்க இயலாத நிலையே தற்போது உள்ளது.

ஜோதிடர்களில் போலி  ஜோதிடர்கள் பலர் உள்ளனர். உண்மையானவர்களை விட  இவர்களின் எண்ணிக்கை மிக மிக அதிகம். பணத்தை மட்டுமே குறிக்கோளாகக் கொண்டு செயல்படும் இவர்களால் தான் ஜோதிடம் மீதான நம்பகத் தன்மை குறைகின்றது. ஜோதிடர்களுக்கும் கெட்ட பெயர் உண்டாகின்றது. இந்த போலி ஜோதிடர்களால் கைது, கோர்ட், வழக்கு என்று மக்களுக்கு பல பிரச்னைகள் ஏற்படுகின்றது. ஆனாலும் அவர்களைக் கண்டறிவதோ,  ஒதுக்கிப் புறந்தள்ளுவதோ இன்றுவரையில் இயலாத ஒன்றாகவே உள்ளது. ஏனெனில் யார் உண்மையானவர், யார் போலியானவர் என்பதைக் கண்டறிவது மிகக் கடினமாக உள்ளது. அந்த அளவிற்கு போலிகள் ஜோதிடக் கலையில் ஊடுருவி உள்ளனர்.

ஜோதிடம் தேவைதானா?
அந்தக் காலத்தில் வாழ்ந்த மக்கள் வாழ்க்கைக்கும் இக்கால மக்கள் வாழ்க்கைக்கும் நிறையவே வேறுபாடு உள்ளது. இன்று உலகம் உள்ளங்கைக்குள் அல்ல, விரல் நுனிக்குள் சுருங்கி இருக்கிறது.தன்னம்பிக்கையுடன் பலரும் பலவித சாதனைகளைச் செய்து வருகின்றனர். இந்நிலையில் ஜோதிடம் போன்றவை தேவைதானா என்ற கேள்விகளும் எழத்தான் செய்கிறது. மேலும் ஜோதிட சாஸ்திரங்கள் என்பவை மிக நுட்பமானவை. அவற்றைச் சரியாகப் புரிந்து கொண்டு பலன்கூறும் ஆற்றல் மிக்கவர்கள் தற்போது உள்ளனரா என்பது கேள்விக் குறி.

ஜோதிடர்களில் பலர் உளவியலறிவில் (Psychology) தேர்ச்சி பெற்றவர்களாக விளங்குகின்றனர். வந்திருப்பவர்களின் தேவை என்னவென்பதறிந்து பலன் கூறுவதில் சமர்த்தர்களாக விளங்குகின்றனர். ஆனால் மக்களின் எதிர்கால நிகழ்வுகளைச் சரியாகக் கணித்துப் பலன் கூற பெரும்பாலோர்களால் முடிவதில்லை. அடிப்படை ஜோதிட நூல்களைப் படித்தும், தத்தம் அனுபவ அறிவாலும்தான் தற்போது பல ஜோதிடர்கள் பலன் கூறி வருகின்றனர். சூர்ய சித்தாந்தம், பூர்வ பாராசர்யம், சாராவளி, பிருஹத் சம்ஹிதை, உத்ரகாலாம்ருதம், சோதிட ரத்னாகரம், சோதிட பாஸ்கரம் போன்ற வட மொழி நூல்களையோ, சந்திர சேகரம், சோதிட அலங்காரம், சோதிட மாலை போன்ற பல தமிழ் நூல்களையோ பயின்றவர்கள் வெகு அரிது. மேலும் காலமாற்றத்திற்கேற்ப ஜோதிட சாஸ்திரங்களில் மாற்றங்கள் செய்யப்பட வேண்டும் என்பதும் சிலரது கருத்தாக உள்ளது. சிலருக்கு அது ஏற்பில்லை.

தன்னம்பிக்கை உள்ளவர்களுக்கு புறக்காரணிகள் ஏதும், எப்போதும் தேவையில்லை. ஆனால் தன்னம்பிக்கை குறையும் போது, அல்லது தமது நம்பிக்கையில் ஏமாற்றம் வரும் போது, அல்லது சரியான வழிகாட்டுதல்கள் பிறரிடமிருந்து நமக்குத் தேவை என்னும் நிலை இருக்கும் போது ஜோதிடம் அங்கே பயன்பாட்டுக்கு வருகிறது. ஆன்மீகமும் அங்கே பயன்பாட்டுக்கு உதவுகிறது என்றாலும் எல்லோராலும் நீண்ட கால அளவில் மட்டுமே பலன் தரக்கூடிய அந்த உயர் அனுபூதி நிலையை அனுசரிக்க முடிவதில்லை. அவர்களுக்கு நம்பிக்கையூட்ட, எல்லாம் சிறிது காலத்தில் சரியாகிவிடும் என்ற மனோவலிமையை ஏற்படுத்த, இதைச் செய்தால் இன்ன பலன் ஏற்படும் என்பதன் மூலம் மனோ தைரியத்தை அதிகரிக்க ’ஜோதிடம்’ பயன்படுகிறது. அந்த நிலையில் உள்ளவர்களுக்கு ஜோதிடம் என்பது தேவைதான். ஆனால் துரதிர்ஷ்டம் என்னவென்றால் பெரும்பாலானோர்கள் அந்நிலையில் தான் இருக்கின்றனர் என்பதும், அவர்களில் பலர் போலிகளை நம்பி ஏமாறுகின்றனர் என்பதும் நாம் மனம் வருந்தத் தக்கது.

மக்கள் அனைவரும் அறவழியில் வாழவேண்டும். பாவங்களையும், குற்றங்களையும் செய்தால் பல சிக்கல்கள் ஏற்பட்டு வாழ்வில் துன்பப்பட நேரிடும் என்பதை உணர்ந்து நல்ல முறையில் தங்கள் வாழ்நாளைக் கழிக்க வேண்டும், என்ற நோக்கத்தில் தான் ஜோதிட சாஸ்திரத்தைச் சான்றோர்கள் உருவாக்கியுள்ளனர். ஒரு தனிமனிதன் தன் எதிர்காலம் பற்றி அறிந்து அதன் வழி நடக்க, எதிர்ப்புகள் போன்றவற்றிலிருந்து தன்னைக் காத்துக் கொள்ள, சிறந்த ஒன்றை இலக்காகக் கொண்டு தனது வாழ்க்கையை நடத்த, ஜோதிடமானது ஓர் தக்க வழிகாட்டியாகவும், நண்பன் போன்றும் செயல்படுவதால் அது மனிதர்களில் ஒரு சிலருக்கு  தேவைப்படுகின்ற ஒரு கலை என்று கூறலாம். ஆனால் இதை மையமாக வைத்து ஆதாயம் தேடும் கும்பல்களால் மக்களுக்கு வாழ்வில் பல்வேறு இடர்ப்பாடுகள் ஏற்படுகிறது. இக்கலையின் பெயரால் மக்களை ஏமாற்றுபவர்கள், அவர்களின் வாழ்வை திசை திருப்புபவர்கள், ஏமாற்றிப் பணம் பறிப்பவர்கள் போன்றோர் மிக மிக கடுமையாகத் தண்டிக்கப்பட வேண்டும்.

முடிவுரை
மானிட வாழ்வில் கடைபிடிக்க வேண்டிய நெறிகள் பற்றியும், அறம் என்பது மானிட வாழ்க்கைக்கு அடிப்படையாவதையும் ஜோதிடக்கலை விளக்குவதுடன், மனிதவாழ்வு செம்மையுறவும், தவறு செய்பவர்கள் அதற்கான தண்டனையையும், காரணத்தையும் அறிந்து திருந்தி வாழவும் அது மறைமுகமாக எச்சரிக்கின்றது.  ஆனால் அதை எவ்வளவு தூரம் புரிந்து கொண்டு ஜோதிடர்களும், ஜோதிடம் பார்ப்பவர்களும் பின்பற்றுகின்றனர் என்பது கேள்விக்குரியது.

(முற்றும்)

[விரைவில்.... நாடி ஜோதிடம் உண்மைதானா? - குறுந்தொடர்]

ஜோதிட மோசடிகள்

ஜோதிடத்தின் பெயரால் செய்யப்படும் மோசடிகளுக்கும் அளவே இல்லை. அதிலும் குறிப்பாக பரிகாரம் என்று கூறிச் செய்யப்படும் மோசடிகள் வன்மையாகக் கண்டிக்கத் தகுந்ததாகும். ஹோமம், யாகம், யந்திரம், தாயத்து என்றெல்லாம் நம்ப வைக்கப்பட்டு பலர் இதில் லட்சக் கணக்கில் பணத்தை இழக்கின்றனர். கர்ம காண்டத்தில் அவற்றிற்குப் பங்குண்டு என்றாலும், அவை மக்களின் குறை போக்குவதற்குப் பதிலாக தனிநபர்கள், தாங்கள் வருமானம் ஈட்டுவதற்காகவே பயன்படுத்தப்படுகின்றன. அதுவும் பரிகாரம் செய்யும் நபர் பூஜைகளில், ஹோமங்களில் நேரடியாகக் கலந்து கொள்ள வேண்டிய அவசியமில்லை, நாங்களே எல்லாம் செய்து விடுகிறோம் என்று பொய் கூறியும் பலர் ஏமாற்றுகின்றனர். அதிலும் ’அதிர்ஷ்டக் கல்’ என்ற பெயரில் செய்யப்படும் மோசடிகள் சொல்லி மாளாது.

எல்லாக் கற்களுக்கும் ஒருவித அதிர்வு உள்ளது. அந்த அதிர்வினால் ஏதோ ஒருவிதத்தில் நமது உடல், மனம் இயங்கும் தன்மையில் சிறு மாற்றமாவது ஏற்படும் என்பது உண்மைதான் என்றாலும் அதுவே முழுக்க முழுக்க உண்மையாகி விட முடியாது. ராசிக்கற்கள் என்பவை எல்லோருக்கும், எல்லாக் காலத்திலும் உகந்தவை அல்ல. சில வகைக்கற்களால் (நீலம், வைரம்) தோஷங்களும், விபரீத எண்ணங்களும், மன விகாரங்களும் கூட ஏற்படலாம். இவையெல்லாம் விரிவான ஆராய்ச்சிக்குரியவை.

ஆனால் போலி ஜோதிடர்களோ வாய் கூசாமல் இந்தக் கல்லைப் போடுங்கள், அந்தக் கல்லை மாற்றுங்கள் என்று ஆலோசனை கூறுகின்றனர். யந்திரத் தகடுகள் செய்வோர், ஆலயப் பூசாரிகள், ஹோம, யாக காண்டிராக்டர்கள், ஜெம் வியாபாரிகள் என்று பலரோடு வணிகத் தொடர்புகொண்டு ஒரு செழிப்பான வியாபாரமாக இதனைப் பலர் செய்து வருகின்றனர்.

கர்மாவும் பரிகாரங்களும்

ஜோதிடத்தில் பரிகாரங்கள் என்பவற்றிற்கு இடமுண்டு என்றாலும் எல்லோருக்கும் பரிகாரங்களால் நன்மை விளையாது என்பதை பலரும் புரிந்து கொள்வதே இல்லை. நம்மால் ஓரளவிற்குத் தான் கர்ம வினைகளின் செயலாற்றலைக் குறைக்க முடியும். முற்றிலுமாகக் கர்மாவை மாற்றி அமைக்க இயலாது. கர்மவினைகளை அனுபவித்துக் கழித்து அதனை 0 ஆக்குவதே சிறந்தது. அது மிகக் கடுமையானதாக இருந்தபோதும் கூட. ஆனால் எல்லோராலும் கர்மவினைகளை அப்படி அனுபவித்திட இயலுமா என்ற கேள்வி எழும் போது, அங்கே விதி என்பதும், விதியை மதியால் வெல்லலாம் என்ற கோட்பாடும் உதவிக்கு வருகிறது. விதியை மதியால் வெல்லலாம்தான் ஆனால் அதற்கும் விதி இருக்க வேண்டும் என்பது மிக முக்கியம். அதாவது கர்ம வினைகளைக் குறைத்துக் கொள்ள, அல்லது மாற்ற ஜாதகத்தில் இடமிருக்க வேண்டும். இல்லாவிட்டால் அது பலனளிக்காது. அதற்குத் தேவை குருவருள்.

ஜாதகத்தில் ’குரு’ என்று அழைக்கப்படும் பிரகஸ்பதி (ஆலயங்களில் தென் திசை நோக்கி, சின்முத்திரையில் அமந்திருக்கும் தக்ஷிணாமூர்த்திக்கும், பிரகஸ்பதி எனும் நவக்ரஹ குருவுக்கும் யாதொரு சம்பந்தமும் இல்லை) நல்ல இடத்தில் அமந்திருந்தால் தான் பரிகாரங்கள் பலிக்கும். அதாவது குரு, உச்சமோ, ஆட்சியோ, கேந்திரமோ, சுபர் வீடோ, பார்வையோ பெற்றிருக்க வேண்டும். அப்போதுதான் பரிகாரங்கள் பூரண பலன் தரும். இல்லாவிட்டால் எல்லாம் அரைகுறையாகத் தான் இருக்கும். இது போன்ற பல விஷயங்கள் தெரியாததால் மக்கள் ஏமாறுகின்றனர். போலி ஜோதிடர்கள் மக்களை ஏமாற்றுகின்றனர்.

ஜாதக பலன்கள்

ராகு, கேது கிரகங்களும், செவ்வாய் தோஷம் போன்றதும் சில சாத்திரங்களில் கணக்காகக் கொள்ளப்படவில்லை. சிலர் ’மாந்தி’ நின்ற வீட்டையும் கணக்கில் சேர்த்து பலன்கள் கூறி வருகின்றனர். சிலர் அதைக் கணக்கில் சேர்ப்பதில்லை. மேலும் லக்னம், ராசி, கேந்திரம், திரிகோணம், பாவக் கட்டம், நவாம்சம், உச்சம், நீசம், நட்பு, பகை, வர்கோத்தமம், வேதை, அஷ்டகவர்க்கம், தசாபுத்தி என பல காரணிகளைக் கொண்டு தான் ஒரு ஜாதகத்தின் முழுமையான பலனை சரியாகக் கணிக்க முடியும். அது நீண்ட நேரம் எடுத்துக் கொள்ளும் விஷயம். ஆனால் பலரும் ஜாதகத்தின் பொதுவான கிரக அமைப்பைப் பார்த்தும், கிரகங்கள் நின்ற வீட்டின் அமைப்பை வைத்தும் பலன்கள் கூறுகின்றனர். அது பலசமயங்களில் தவறான முடிவினைத் தந்து விடுகிறது. அதனால் ஜாதகம், ஜோதிடம் எல்லாமே பொய் என்ற முன் முடிவுக்கு அதனைப் பார்ப்பவர்கள் வந்து விடுகின்றனர்.

உண்மையான ஜோதிடர்கள் யார்?

மக்கள் நலம் விரும்புபவர்கள், தாங்கள் அறிந்ததை மற்றவர்களுக்கு அளித்து அவர்கள் பயன் பெற உதவுபவர்கள், எல்லோரும் தீவினைகள் நீங்கி, நல்லவராக, சகோதரராக வாழ வேண்டும் என்று நினைப்பவர்கள் உண்மையான ஜோதிடர்கள். தம்மை நாடி வந்திருப்பவர்களின் பிரச்சனை என்ன, அது ஏன் ஏற்பட்டது, அதற்கான கிரகநிலை மற்றும் சமூக, உளவியல் காரணங்கள் என்ன, அதை ஜாதகர் அதிக செலவுகளும், பிரச்சனைகளும் இல்லாமல் தாமே எவ்வாறு தீர்த்துக் கொள்ள முடியும் என்பது பற்றி சுயநல நோக்கமற்று அறிவுறுத்துவர்களே உண்மையான ஜோதிடர்கள். ஆனால் தற்காலத்தில் இதுபோன்ற உண்மையான ஜோதிடர்களைப் பார்ப்பது வெகு அபூர்வமானதாகி விட்டது. தேடிக் கண்டறியும் நிலையிலேயே அவர்கள் உள்ளனர்.

(தொடரும்)

ஜோதிடக் கட்டம்

 

பண்டைக் காலங்களில் ஜோதிடம்

பண்டைக் காலங்களில் மன்னர்கள் ஜோதிடத்தை தங்கள் பயன்பாட்டிற்கு உரியதாக வைத்திருந்தனர் என்பதை சேரன் செங்குட்டுவன், இளங்கோவடிகள் வரலாற்றிலிருந்து தெரிந்து கொள்ள இயலுகிறது. புத்தர் பிறந்த பின்பு ஜோதிடம் மூலம் அவர் எதிர்காலம் கணிக்கப்பட்டுள்ளது. இயேசு பெருமான் பிறப்பதைக் கூட வானில் தோன்றிய நட்சத்திரங்களை வைத்துக் கணக்கிட்டு முன்னரே அருள் வாக்கு கூறுபவர்கள் தெரிவித்துள்ளனர். உலகளாவிய அளவில் ஜோதிடத்தில் பன்னெடுங்காலம் முதலே நம்பிக்கைகள் நிலவி வருகின்றன. தமிழக மன்னர்கள் பலரும் ஜோதிடம், சகுனம் போன்றவற்றின் மீது நம்பிக்கை உள்ளவராகவே இருந்து வந்திருக்கின்றனர்.

மன்னர்கள், போர் முதலியனவற்றிற்குச் செல்லும் பொழுது, தங்களின் வெற்றி தோல்வி குறித்து அறிய நிமித்திகம் பார்த்துள்ளதாக பண்டை  இலக்கியங்கள் மூலம் அறிய முடிகிறது. அப்பணியைச் செய்தவர்கள் நிமித்திகர்கள் என்று அழைக்கப்பட்டனர்.  ‘நிமித்திகன்’ என்பதற்கு வருங்காரியம் சொல்வோன், சாக்கை, வள்ளுவன் எனச் சூடாமணி நிகண்டு பொருள் கூறுகின்றது. சகுனத்தை நம்புதலையும், நல் வாக்கு கேட்டலையும் ‘விரிச்சி கேட்டல்’ எனப் புறப்பொருள் வெண்பாமாலை  சுட்டுகின்றது.

மன்னரின் உடல்நலம், போர் முதலியவற்றுக்கான ஆலோசனைகள் வழங்கல், முடிசூட்டுதல் முதலியவற்றிற்கு நல்ல நாள் குறித்தல் போன்ற பணிகளில் இக்கலைஞர்கள்  ஈடுபட்டனர். இவர்கள் ‘நிமித்திகர்கள்’ எனவும் ‘வள்ளுவர்கள்’ எனவும் அழைக்கப்பட்டனர். ’வாக்குக்கு வள்ளுவன்’ என்பது இவர்கள் பெருமையை விளக்கும். இலக்கியங்களிலும் இவர்கள் ‘கணியன்’ என்று அழைக்கப்பட்டிருக்கின்றனர். கணியன் என்றால்- கணிதம் அறிந்தவன், கணித்துக் கூறுபவன் என்பது பொருள். சங்ககாலப் புகழ் பெற்ற கவிஞர் கணியன் பூங்குன்றனார் இவ்வகையினரே! வழிவழியாக மன்னர்களுக்கு மட்டுமே என்றிருந்த இக்கலைகள் பின்னர் மக்களுக்கும் உரியதாயிற்று.

ஜோதிடத்தின் வளர்ச்சியும் இன்றைய நிலையும்

தற்போது கிராமப்புறம் என்றில்லாமல், நகர்ப்புறங்களிலும் ‘ஜோதிடம்’ என்பது மக்கள் வாழ்வின் ஒரு கூறாக, சமுதாயத்தோடு தொடர்புடையதாக விளங்கி வருகின்றது. ஜோதிடத்திற்கு என்றே தமிழில் தற்பொழுது கிட்டத்தட்ட 20-க்கும் மேற்பட்ட வார, மாத இதழ்கள், பத்திரிகைகள் வருகின்றன என்பதே அதன் செல்வாக்கை விளக்கும்.

ஆனால் ஒருகாலத்தில் திருமணம், நோய், தொழில் முன்னேற்றம் போன்ற குறிப்பிட்ட நிகழ்வுகளுக்காகவே ஜோதிடம் பார்த்து வந்தார்கள். ஆனால் தற்போது வீட்டை விட்டு வெளியே செல்வதற்குக் கூட ஜோதிடரின் ஆலோசனை பெற்றே வெளியே செல்லும் அளவிற்கு அந்தக் கலை வளர்ந்திருக்கிறது. ’எதைத் தின்றால் பித்தம் தெளியும்’ என்று மக்கள் ஜோதிடர்களின் பின்னால் ஓடிக் கொண்டே இருக்கின்றனர்.

உண்மையாகவே ஜோதிடத்தில் ஈடுபாடு கொண்டும், மக்களுக்கு நல்லது சொல்ல வேண்டும் என்ற அக்கறையிலும், பரம்பரை பரம்பரையாக ஜோதிடம் பார்த்தும் வரும் ஒருசிலரைத் தவிர, தற்போது பலரும் உழைக்காமலேயே அதிக பணம் சம்பாதிக்க வேண்டும் என்ற நோக்கத்திலும், குறுகிய காலத்தில் பணம், புகழ், சமூக அந்தஸ்து பெற வேண்டும் என்ற நோக்கிலும் இந்தத் தொழிலில் ஈடுபட்டு வருகின்றனர். தெருவிற்குத் தெரு காணப்படும் தேநீர்க்கடைகளைப் போல இப்பொழுது ஜோதிட நிலையங்கள் புற்றீசல் போல  நகரெங்கும் காணப்படுகின்றன. அனுபவமில்லாத பலரும், பணம் சம்பாதிப்பது ஒன்றையே குறிக்கோளாகக் கொண்டு, ஜோதிட நிலையத்தை நடத்திவருகின்றனர். பலர் பத்திரிகைகள் வாயிலாகவும், தொலைக்காட்சி போன்ற ஊடகங்கள் மூலமும் இத்தொழிலை நடத்தி வருகின்றனர்.

பணியிலிருந்து ஓய்வுபெற்ற ஆசாமிகள் உட்பட போலி ஜோதிடர்கள் பலர் தற்போது பொழுதுபோக்காக ஜோதிடம் கற்றுக் கொண்டு, கோயில் அர்ச்சகர்கள், ஹோமங்கள் முதலியன செய்யும் முகவர்களுடன் தொடர்பு வைத்துக் கொண்டு தங்களை நாடி வரும் மக்களை பரிகாரங்கள், ஹோமங்கள், யந்திரம், மந்திரம் என்று பலவாறாகச் சொல்லி ஏமாற்றி வருகின்றனர். எங்கும், எக்காலத்திலும், எல்லாத்துறையிலும் போலிகள் நிறைந்து உள்ளனர். ஜோதிடக்கலையும் இதற்கு விதி விலக்கல்ல.  இத்துறையிலும் மிகுதியான அளவில் போலிகள் ஈடுபட்டு உள்ளனர். ஆனால் அவர்கள் போலிகள் என்பது அவர்களிடம்  ஜோதிடம் பார்த்து ஏமாந்த பின்னரே தெரியவருகின்றது. இத்தகைய போலி  ஜோதிடர்களின் செயல்களால், செய்யும் தவறுகளால் ஜோதிடக் கலைக்கும் கெட்டபெயர். பரம்பரை பரம்பரையாக இத்தொழிலில் ஈடுபட்டிருக்கும் உண்மையான  ஜோதிடர்களுக்கும் அவமானம்.

மக்களோ தம்மையும் நம்பாமல், கடவுளையும் நம்பாமல் ஆட்டு மந்தைகளாக இத்தகைய போலி ஜோதிடர்களின் பின்னால் சென்று கொண்டிருக்கின்றனர். இந்நிலை மாறுவதற்கு ஆவன செய்ய வேண்டியது உண்மையான பரம்பரை ஜோதிடர்களின் மிக முக்கியக் கடமையாகும்.

(தொடரும்)

ஜோதிடம் என்பது உண்மைதானா, அதை நாம் முழுக்க முழுக்க நம்பலாமா இது எல்லோர் மனதிலும் இருக்கும் கேள்வி. ”ஜோதிடம் என்பதெல்லாம் சும்மா ஏமாற்றுவேலை. உழைக்காமலேயே மக்களை ஏமாற்றிப் பணம் பறிக்கச் சிலர் செய்யும் சாகசங்கள் தான் ஜோதிடம்” – இது சிலரது கருத்து. “அதெல்லாமில்லை. ஜோதிடம் என்பது வேதகாலம் தொட்டு காலம் காலமாக இருந்து வரும் ஒரு ஆரூட முறை. அதைப் பார்த்து, அதன்படி நடப்பதில் தவறொன்றுமில்லை” இது சிலரது கூற்று.

சரி ஜோதிடம் என்றால் என்ன, அது உண்மைதானா, அது மனித வாழ்வுக்கு உண்மையிலேயே அவசியம்தானா, அதனால் ஏற்படும் நன்மை, தீமைகள் பற்றியெல்லாம் இனி ஒவ்வொன்றாகக் காண்போம்.

ஜோதிடம் என்றால் என்ன?

வடமொழியில் ‘ஜ்யோதிஷம்’ என்று கூறப்படுவதே தமிழில் ஜோதிடம் என்று கூறப்படுகிறது. “அறிவைத் தரும் ஒளி” என்பது இதன் பொருளாகும். இதே பொருளிலேயே இது தமிழிலும் சோதி + இடம் = ‘சோதிடம்’ என அழைக்கப்படுகிறது. வேதத்தின் ஆறுபாகங்களில் ஜோதிடமும் ஒன்று. தமிழிலும் ‘சோதிடக்கலை’ ஆய கலைகள் அறுபத்து நான்கனுள் ஒன்றாகக் கருதப்படுகின்றது. இதில் மேல் நாட்டவர்கள் ‘சாயன முறை’ என்பதைப் பின்பற்றுகிறார்கள். நம் இந்திய நாட்டில் பின்பற்றப்படும் முறை ‘நிராயன முறை’ என்பதாகும். இந்த ஜோதிடத்தில் பல்வேறு உட் பிரிவுகளும் உள்ளன. பராசரர், ஜைமினி, வராகமிகிரர் என பல மகரிஷிகள் பல்வேறு முறைகளை வகுத்துத் தந்துள்ளனர். காலமாற்றத்திற்கேற்ப வாக்கிய பஞ்சாங்கம், திருக்கணிதம் என பல்வேறு முறைகளிலும் ஜாதகம் கணிக்கப்பட்டு பலன்கள் சொல்லப்பட்டு வருகின்றன. பல்வேறு அயனாம்ச முறைகளும் எபிமெரீஸ் போன்றவைகளைப் பயன்படுத்தியும் ஜாதகங்கள் துல்லியமாகக் கணிக்கப்பட்டு பலன்கள் கூறப்பட்டு வருகின்றன.

Astro Chart

பொதுவாக படித்தவர், பாமரர் என்றின்றி அனைவராலும் அணுகப்படும் கலையாக ஜோதிடக்கலை விளங்குகின்றது. சாதாரண மனிதர் முதல் நாட்டின் தலையாய மனிதர்கள் வரை அனைவருமே பெரும்பாலும் ஜோதிடத்தில் நம்பிக்கை கொண்டுள்ளனர். தங்கள் எதிர்காலம் பற்றி அறிவதற்காக நேரடியாகவோ, மறைமுகமாகவோ ஜோதிடத்தைப் பார்த்து பலன் அறிந்து கொண்டு வருகின்றனர்.

நம் நாட்டில் பல்வேறு விதமான ஜோதிட முறைகள் பயன்பாட்டில் உள்ளன. ஒருவர் பிறக்கும் போது அமைந்த கிரகநிலைகளின்படி, அவருக்கு, அவர்தம் எதிர்கால வாழ்க்கையினைப் பற்றிய பலாபலன்களைக் கூறுவது பொதுவாக நடைமுறையில் உள்ள  ஜோதிட முறையாகும். மற்றும் கை ரேகை சோதிடம், எண் கணித சோதிடம், கிளி சோதிடம், பிரசன்ன சோதிடம், முகக்குறி பார்த்துப் பலன் சொல்லுதல், மூச்சு ஜோதிடம், பிரமிடு ஜோதிடம், கோடங்கி பார்த்தல் எனப் பல்வேறு முறைகள் புழக்கத்தில் உள்ளன.

ஜோதிடம் பற்றி கலைக்களஞ்சியம்

ஜோதிடம் பற்றி கலைக்களஞ்சியம் கூறுவது முக்கியமானது. அது, ஜோதிடம் என்பது வேதகால ஆரியர்களுக்கும் முற்பட்டகலை என்றும், சுமார் இரண்டாயிரம் ஆண்டுகளுக்கு முன்பே பழங்கால மக்கள் அதனை அறிந்து வைத்து இருந்தனர் என்றும், மிகவும் பழமையான கலை என்றும் அது குறிப்பிடுகின்றது.

மேலும் ‘சோதிடம் என்பது கிரகங்களின் நிலையை வைத்தும், நட்சத்திரங்களின் நிலையைக் கொண்டும் மானிட, உலக விவகாரங்களைப் பற்றி, முன்கூட்டியே அறிய முடியும் என்ற நம்பிகையை ஆதாரமாக உடையது’ எனக் கூறுகின்றது.

‘சங்கிதை போன்ற நூல்கள்  ஒரு தனி மனிதனுக்கு மட்டுமல்லாது, ஒரு நாட்டிற்கு, உலகிற்கு, அதன் கண் உள்ள மக்களுக்கு என அனைவருக்கும் பலன்கள் கூறும் தன்மை படைத்தனவாக உள்ளது என்றும் சான்றாகப் பராசரர் சங்கிதை, மத்திய சங்கிதை, கர்கர் சங்கிதை மற்றும் சாராவளி போன்ற நூல்களைக் குறிப்பிடலாம்’ என்றும் கலைக்களஞ்சியம் (தொகுதி ஐந்து, பக்: 260-263) குறிப்பிடுகின்றது.

மேற்கண்ட கருத்துக்கள் மூலம் ஜோதிடம் என்பது தொன்மையான ஒரு கலை என்றும், இந்தியா முழுக்க பயன்பாட்டில் இருந்த ஓர் பயிற்சி முறை ஆருடம் என்றும் நாம் அறிந்து கொள்ளலாம்.

(தொடரும்)

அன்னையின் மலர் வழிபாடு

ஸ்ரீ அன்னை

அன்னை வலியுறுத்திய வழிபாடுகளில் மிக முக்கியமானது மலர் வழிபாடு. அன்னைக்கு மலர்களின் மீது அளவற்ற விருப்பம் உண்டு. அதன் தூய்மை, புத்துணர்ச்சி, அழகு, சுயநலமின்மை ஆகியவற்றைப் பற்றி அவர் புகழ்ந்துரைத்திருக்கிறார். ஆசிரமத்தில் தானே ஒரு தோட்டத்தை உருவாக்கி அதில் அழகான பல மலர்களை நட்டு தம் இறுதிக்காலம் வரை பராமரித்து வந்திருக்கிறார். ‘மலர்கள் இயற்கை அன்னையின் எழில் மிகு வடிவங்கள்’ என்பது ஸ்ரீ அன்னையின் கருத்தாகும்.

ஸ்ரீ அன்னை, சுமார் எண்ணூறிற்கும் மேற்பட்ட மலர்களைப் பற்றி, அவற்றை வைத்து இறைவனை வழிபடுவதால் ஏற்படும் பலன்கள் பற்றி சாதகர்களிடம் தெரிவித்திருக்கிறார். அவற்றைப் பற்றி நாமும் தெரிந்து கொண்டு பயனடைவோம்.

____________________________________________________________________________________________
மலர்                              பலன்
____________________________________________________________________________________________

ரோஜா                 குறைகள் விலகும். தடைகள் அகலும். வெற்றி தரும்

மல்லிகை          சோதனைகள் நீங்கும்,  இன்பம் பெருகும்

துளசி                     மனத்தூய்மை பெருகும். பக்தி சிறக்கும்

சாமந்தி               வலிமை, புது சக்தி உண்டாகும். பகைகள் விலகும்

செம்பரத்தை      தெய்வீக அன்பு கிடைக்கும்

நித்திய கல்யாணி          முன்னேற்றம் தரும்.

எருக்கம்பூ              வல்லமை, தைரியம், மன உறுதி தரும்

செந்தாமரை          தெம்பு, வலிமை, புத்துணர்ச்சி, உயர்வு தரும்

வெண்தாமரை        தெய்வீக உணர்வு மேம்படும். மன மாசுக்கள் அகலும்

காகிதப்பூ              பாதுகாப்பு உணர்வு மிகும்.

வாடாமல்லி    நோயற்ற தன்மை, ஆயுள் விருத்தி, ஆபத்துக்கள் விலகும்

செவ்வரளி        தவறுகள் விலகி, ஒழுங்குகள் ஏற்படும்

மரிக்கொழுந்து       வெற்றியைத் தரும்

பவழ மல்லி             நியாயமான ஆசைகள் நிறைவேறும்

நந்தியாவட்டை     புத்துணர்ச்சி தரும். மனத்தூய்மை உண்டாகும்

ஸ்ரீ அன்னையைப் பணிவோம். ஆனந்தம் பெறுவோம்.

“I have a sweet little Mother
Who lives in my heart
We are so happy together
We shall never depart.”  
                          – The Mother

1973 ஆம் ஆண்டு. நவம்பர் மாதம் பதினேழாம் தேதி. நேரம் இரவு 7.25க்கு ஸ்ரீ அன்னை மகா சமாதி அடைந்தார். அவர் மறைந்து இன்றோடு 36 ஆண்டுகள் பூர்த்தியாகி விட்டன. ஸ்ரீ அன்னையை இந்நாளில் நினைவு கூர்வோம். 

ஸ்ரீ அன்னை

அகில உலகுக்கும் தாயாகப் போற்றப்படும் ஸ்ரீ அன்னையின் அறிவுரைகள் இங்கே…

‘நமக்கு ஒன்றுமே தெரியாது’ என நாம் உணர்வதே, ஞானத்தை அடைவதற்கான முதல் படி.

முழு தன்னம்பிக்கையுடனும் உண்மையான நேர்மையுடனும் செய்யப்படும் பிரார்த்தனைகளுக்கு நிச்சயம்  நல்ல பலனுண்டு.

கடவுள் நீ விரும்புவதையெல்லாம் உனக்குக் கொடுத்து விடுவதில்லை. எதை அடைய உனக்குத் தகுதி  இருக்கிறதோ அதை மட்டுமே கொடுக்கிறார்.

இறைவனிடம், ‘நமக்கு அது வேண்டும், இது வேண்டும்’ என்று வேண்டுவதை விட, நமக்குத்  தேவையானது எதுவோ, அதை, அவனே தருமாறு ஒப்படைப்பது சிறந்தது.

‘பக்தி’ என்பது தனக்காக இறைவனிடம் வேண்டிக் கொள்வது அல்ல. இறைவனுக்காகத் தன்னை  முழுமையாக அர்ப்பணித்துக் கொள்வதே உண்மையான பக்தி.

சிறிய காரியங்களில் வெற்றியடைவதை விட, மகத்தான பெரிய இலட்சியங்களில் தோல்வி அடைவது  எவ்வளவோ மேல்.

மனிதனின் அதிருப்திக்கு, சோகத்திற்கு, தோல்விகளுக்கு அவனுடைய தான் என்ற எண்ணமும், அகந்தையுமே மிக முக்கிய காரணம் ஆகிறது.

இளம் வயதில் அன்னை

ஒருவன் தியானத்தின் மூலம் முன்னேற முடியும். ஆனால் நேர்மையாகச் செய்யப்படும் கர்மயோகத்தால், பல மடங்கு அதிகம் முன்னேற முடியும்.

ஒருவன் எவ்வளவு நேரம் தியானம் செய்கிறான் என்பது  ஆன்மிக முன்னேற்றத்தைக் காட்டாது. மாறாக தியானம் செய்ய எந்த முயற்சியுமே தேவையில்லை என்னும் நிலையை எட்டுவதே உண்மையான ஆன்மிக முன்னேற்றமாகும்.

நீ எப்படி இருந்தாய் என்பதை நினைத்துக் கவலைப்பட்டுக் கொண்டிருக்காதே! எப்படி இருக்க  விரும்புகிறாய் என்பதை மட்டும் நினை. நீ நிச்சயம் முன்னேறுவாய்.

அச்சமுற்றுக் கலக்கமுடன் உன் வருங்காலத்தை எதிர் நோக்காதே.

நம் அவநம்பிக்கையே நம் குறைபாடுகளின் தோற்றுவாயாக இருக்கிறது. உயர்விற்குத் தேவை பூரண  நம்பிக்கையே

அன்னை

ஸ்ரீ அன்னையைப் பற்றி திரு. கங்கை அமரன் பாடிய மலர் போல மலர்கின்ற… பாடலைக் கேட்கக் கீழே சுட்டவும்.

http://www.hummaa.com/music/song/Malar+Pola/102668

http://www.hummaa.com/music/song/Malarpola+%28repeat%29/102679

http://www.hummaa.com/music/song/Malarpola+%28theme+Song%29/102127

பாடல் வரிகள் இங்கே….

மலர் போல மலர்கின்ற மனம் வேண்டும் தாயே!
பலர் போற்றிப் பாராட்டும் குணம் வேண்டும் தாயே!
வரம் தரும் அன்னையே! வணங்கினோம் உன்னையே
வரம் தரும் அன்னையே! வணங்கினோம் உன்னையே (மலர் போல…)

அன்னையின் வருகை

ஒரு நோயும் தீண்டாமல் அணைபோடு தாயே!
நதி காய நேராமல் நீருற்று தாயே!
நல் நிலம் பார்த்து தாயே!

எளியோர்கள் மகிழ்வாக்க வழிகாட்டு தாயே!
வலியோர்கள் வாட்டாமல் வகை காட்டு தாயே!
என் வளமான தாயே!

பசி தாகம்  காணாமல் பயிராக்கு தாயே!
ரசிப்போர்கள் செவி தேடி இசையூட்டு தாயே!
இசைப் பாட்டை என்றென்றும் இனிப்பாக்கு தாயே! (மலர் போல…)
 
புகழ் செல்வம் நலம் கல்வி குறைவின்றி வாழ
புவி மீது இறைஞானம் எமை என்றும் ஆள
திரு குறையாமல் வாழ

அருளோடு பொருள் பேத அறிவோடு ஞானம்
தெளிவோடு தினம் காணும் நிலை வேண்டும் வேண்டும்
அது திரளாக வேண்டும்

பல வீடு பல நாடு பல தேசம் என்று
உணராமல் வாழ்வோரை  ஒன்றாக்கு தாயே!
உறவோடு மகிழ்வோடு எனை மாற்று தாயே! (மலர் போல…)

(நன்றி: கங்கை அமரன்)

மதர் சிம்பல்

அம்மாவும் நீயே அப்பாவும் நீயே
அன்புடனே ஆதரிக்கும் தெய்வமும் நீயே
அம்மா… அம்மா… அம்மா.. அம்மா!

பாடலைக் கேட்க சுட்டவும்

http://www.hummaa.com/music/song/Ammaum+Neeyee/142306

அன்னையைப் போற்றிடுவோம்; அவள் பாதம் பணிந்திடுவோம்
அன்னையும் காத்திடுவாள்; என்றும் ஆனந்தம் தந்திடுவாள்

ஓம் நமோ பகவதே ஸ்ரீ அரவிந்தாயா!
ஓம் ஸ்ரீ ஆனந்தமயி ஓம் ஸ்ரீ சைதன்யமயி ஓம் ஸ்ரீ சத்யமயி பரமே!

அம்மா சரணம்

 அம்மா சரணம்! தாயே சரணம்! குருவே சரணம்!

ஓம் நமோ பகவதே!

சித்தர்கள், யோகிகள், ஞானிகள் போன்றோர் வாழ்ந்த பெருமை மிக்க  இந்து ஞான மரபில் சதா பிரம்ம நிலையிலேயே இருந்து, அந்த இறைநிலையோடு ஒன்றி வாழ்க்கை நடத்தியவர்கள் பிரம்ம ஞானிகள் என அழைக்கப்பட்டனர். சுகப் பிரம்ம மகரிஷி, ஜனக மகரிஷி போன்ற அந்த அவதூத ஞானிகளின் வரிசையில் குறிப்பிடத் தகுந்தவர் ஸ்ரீ த்ரைலிங்க சுவாமிகள்.

சுவாமிகள் ஒரு மாபெரும் அவதார புருடர். ஆனால் ஒன்றுமே அறியாத பித்தர் போன்று காசி நகரத் தெருக்களில் சுற்றிக் கொண்டிருப்பார். அவரது முதுகில் மூன்று லிங்க வடிவிலான குழிகள் காணப்பட்டதால் பக்தர்கள் அவரை த்ரைலிங்க சுவாமிகள் என அழைத்தனர். குள்ளமான உருவம். நீண்ட கைகள். உருண்டையான முகம். பெரிய வயிறு என்று சுவாமிகளின் தோற்றம் மிக வித்தியாசமானதாக இருக்கும். சுவாமிகள் யாருடனும் எதுவும் பேச மாட்டார். உணவு உண்பது என்பது எப்போதாவது ஒருமுறைதான். பல நாட்கள் பட்டினியாக இருப்பார். சமயங்களில் அன்பர்கள் கொண்டு வரும் தயிர்ப்பானைகளை சளைக்காமல் குடம் குடமாகக் குடிப்பார். மணிகர்ணிகா படித்துறையில் உச்சி வெயிலில் சுடும் பாறை மீது அமர்ந்திருப்பார். அவதூதர் என்பதால் உடலில் ஒட்டுத் துணி இருக்காது. அதைப் பற்றி எந்த வித அக்கறையுமின்றி கடும் வெயிலில் அமர்ந்திருப்பார். தான், தனது, தன்னுடைய உடல்  என்ற உணர்வுகள் அற்றவராக அவர் இருந்தார். சமயங்களில் கடும் குளிரில் தண்ணீருக்குள் இறங்குவார். உள்ளேயே மூச்சடக்கி அமர்ந்திருப்பார். இல்லாவிட்டால் தண்ணீரின் மீது சப்பணமிட்டு அமர்ந்து கொண்டோ அல்லது தண்ணீரில் படுத்த வாக்கில் மிதந்து கொண்டோ இருப்பார். சில சமயம் உச்சி வெயிலில் அவதூதராய் காசி மாநகரத்துத் தெருக்களைச் சுற்றி வந்து கொண்டிருப்பார். காலத்தை, இயற்கை விதிகளை வென்ற மகாபுருடராக இம்மகான் விளங்கி வந்தார்.

இறையனுபூதி பெற்ற இம்மகானை பகவான் ஸ்ரீ ராமகிருஷ்ணர் தரிசனம் செய்திருக்கிறார். காசி, பிருந்தாவனம் போன்ற பல புண்ணிய தலங்களுக்கு யாத்திரையை மேற்கொண்ட ராமகிருஷ்ணர், காசியில் ஒரு மடத்தில் தங்கியிருந்த த்ரைலிங்க சுவாமிகளைச் சந்தித்து ஆசி பெற்றார். காசியில் ராமகிருஷ்ணர் தரிசித்த ஞானிகளில் மகான் த்ரைலிங்க சுவாமிகள் ஒருவரே பிரம்ம ஞானியாக விளங்கியவர். இதனை சுவாமி விவேகானந்தரிடம், ’ஒரு மிகப் பெரிய மகானைச் சந்தித்தேன்’ என்று சொல்லி விளக்கிக் கூறியிருக்கிறார் பரமஹம்சர். பிற்காலத்தில் சுவாமி விவேகானந்தரும் மகான் த்ரைலிங்க சுவாமிகளைச் சந்தித்து ஆசி பெற்றிருக்கிறார். மஹா அவதார் பாபாஜியின் நேர் சீடரான மகான் ஸ்ரீ ஸ்ரீ லாஹரி மஹா சாயர், த்ரைலிங்க சுவாமிகளின் உற்ற நண்பராகத் திகழ்ந்தவராவார்.

லாஹரி மஹா சாயர் (1828-1895), ராமகிருஷ்ண பரமஹம்சர் (1836-1886), விவேகானந்தர் (1863-1902) என பல காலகட்டத்தைச் சேர்ந்தவர்களும் சுவாமிகளை தரிசித்துச் சென்றிருக்கின்றனர். பரமஹம்ச யோகானந்தர் தனது ’ஒரு யோகியின் சுயசரிதம்’ நூலில் த்ரைலிங்க சுவாமிகள் கிட்டத்தட்ட 300 வருடங்களுக்கு மேல் வாழ்ந்தவர் என்று  குறிப்பிட்டிருக்கிறார்.

மிகச் சிறந்த தவயோகியாகத் திகழ்ந்த இம்மகான் பல்வேறு அற்புதங்களை நிகழ்த்தியிருக்கிறார்.

அவதூதர் என்பதால் எப்போதும் சுவாமிகள் நிர்வாணமாகவே இருப்பார். ஆனால் சுவாமிகள் இவ்வாறு நிர்வாணமாகச் சுற்றி வருவது காவல்துறையினருக்குப் பிடிக்கவில்லை. ஒருநாள் அவர்கள் சுவாமிகளைப் பிடித்து சிறையில் அடைத்துப் பூட்டி விட்டனர். ஆனால் சற்று நேரத்தில் சுவாமிகள் வழக்கம் போல் வெளியே சுற்றிக் கொண்டிருந்தார்.

பூட்டிய கதவு பூட்டியபடி இருக்க, சுவாமிகள் எவ்வாறு வெளியேறினார் என்பது தெரியாமல் காவலர்கள் திகைத்தனர். அதனால் சீற்றமுற்ற அவர்கள், மீண்டும் சுவாமிகளைப் பிடித்து வந்து கதவை பலமாகப் பூட்டி, காவலுக்கு என்று தனி ஆளையும் நியமித்தனர். ஆனால் சுவாமிகளோ சற்று நேரத்தில் சிறையிலிருந்து மாயமாய் மறைந்து, அதன் மாடிப் பகுதியில் நடமாடிக் கொண்டிருந்தார். இதனால் சலிப்புற்ற காவலர்கள் சுவாமிகளைச் சிறையில் அடைப்பதை நிறுத்தினர். சுவாமிகளும் காசி மாநகரத்தின் தெருக்களில் வழக்கம் போலச் சுற்றி வர ஆரம்பித்தார்.

******

காசியில் பிராம்லி என்ற வெள்ளைக்காரர் அப்போது சப்கலெக்டராக இருந்தார். ஆடையின்றி அவதூத கோலத்தில் காசி நகரத் தெருக்களில் சுற்றிக் கொண்டிருந்த சுவாமிகளைப் பார்த்ததும் அவருக்குக் கோபம் பொங்கியது. தன்னிடமிருந்த சவுக்கால் சுவாமிகளை அடித்தார். ஆனால் அந்த அடி சுவாமிகளின் மேல் விழவில்லை. மாறாக அவர் மனைவி மீது விழுந்து அவர் வலி தாளாமல் அலறினார். அதனால் சுவாமிகளை ஒரு மாயாவி என்று நினைத்த பிராம்லி, தன் வீட்டிற்கு அவரை இழுத்துச் செல்லுமாறு தன் சேவகர்களுக்கு உத்தரவிட்டார். கலெக்டரின் வீட்டிலும் உறவினர்கள் அனைவரது உடலில் இருந்தும் சாட்டையடி பட்டு ரத்தம் கசிந்து கொண்டிருந்தது. அது கண்டு மிகவும் சீற்றமுற்ற பிராம்லி துரை ‘இந்த மாயாவியை இருட்டறையில் அடையுங்கள்’ என்று தனது சேவகர்களுக்குக் கட்டளையிட்டு விட்டு, அந்த அறையைப் பூட்டிச் சாவியைத் தானே வைத்துக் கொண்டார். பணி நிமித்தமாக மீண்டும் வெளியே புறப்பட்டுச் சென்றார்.

சற்று நேரத்தில் அவர் கண்ட காட்சி அவரைத் திடுக்கிடச் செய்தது. சுவாமிகள் வழக்கம் போல் அவதூதராய் அவர் முன்னால் சாவதானமாக நடந்து சென்று கொண்டிருந்தார். ஆச்சரியம் மேலிட அருகிலுள்ளோரிடம் சுவாமிகளைப் பற்றி விசாரித்தார் கலெக்டர். அப்போது தான் மகானின் மகிமை பற்றி அவருக்குத் தெரிய வந்தது. சுவாமிகளைப் பணிந்து வணங்கிய பிராம்லி, தான் செய்த அவச்செயலுக்காக தன்னை மன்னிக்குமாறு வேண்டினார். சுவாமிகளும் அவரை மன்னித்தார். தனது அஞ்ஞானம் நீங்கிய அன்றைய தினத்தன்று வருடம் தோறும் சுவாமிகளுக்கு ஆராதனை நடத்திக் கொண்டாட ஒரு கட்டளையையும் பிராம்லி ஏற்படுத்தினார். அது ‘பிராம்லி கட்டளை’ என்ற பெயரில் இன்றறளவும் காசியில் நடந்து வருவதாகக் கூறப்படுகிறது.

வெகுகாலம் வாழ்ந்து காசியில் பல்வேறு அற்புதங்கள் நிகழ்த்திய இம்மகான் பின் நேபாளத்தில் பசுபதிநாத் அருகில் ஜீவசமாதி அடைந்தார்.

மகான்களின் பெருமை பேசவும் இனிதே!

டாக்டர் இயான் ஸ்டீவன்சன்

டாக்டர் இயான் ஸ்டீவன்சன், கனடாவில் பிறந்தவர். அடிப்படையில் ஒரு உளவியல் நிபுணரான இவர் அமெரிக்காவின் புகழ்பெற்ற விர்ஜீனியா பல்கலைக்கழகத்தில் பேராசிரியராகப் பணிபுரிந்தவர். முற்பிறவி-மறுபிறவி பற்றிய விஷயங்களில் இவருக்கு ஆர்வம் ஏற்பட அதுபற்றி தீவிரமாக ஆராய்ந்தார். உலகெங்கும் பயணம் மேற்கொண்டார். முற்பிறவி ஞாபகங்கள் வந்ததாகக் கூறப்படுபவர்களைச் சந்தித்தார். அவர்கள் கூறும் முற்பிறவிகள் பற்றியும், அதனுடன் தொடர்புடைய சம்பவங்கள், மனிதர்கள் குறித்தும் ஆராய்ந்தார். பல்வேறு பரிசோதனை முயற்சிகளை மேற்கொண்டார். முடிவில் சிலருக்கு மட்டும் முற்பிறவி நினைவுகள் ஏற்படுவது உண்மையே என்றும் அதற்கான காரணங்கள் பல இருக்கின்றன என்றும் கூறி அது பற்றிய பட்டியல்களையும் வெளியிட்டார்.

முற்பிறவி, மறுபிறவி பற்றி பல்வேறு ஆய்வுக் கட்டுரைகளையும், நூல்களையும் ஸ்டீவன்சன் எழுதியிருக்கிறார். அதில் குறிப்பிடத் தகுந்தது, ’Twenty Cases Suggestive of Reincarnation’ என்பதாகும். அமெரிக்காவின் புகழ்பெற்ற பேராசிரியர்களும், மருத்துவர்களும், விஞ்ஞானிகளும் டாக்டர் ஸ்டீவன்சனின் ஆய்வு முடிவுகளை ஏற்றுக் கொண்டதுடன், அவர் முறைப்படி ஆய்வு செய்து அவற்றை நீருபித்திருப்பதாகவும், இதில் ஐயப்பட ஏதுமே இல்லை என்றும் தெரிவித்துள்ளனர்.

விர்ஜீனியா பல்கலைக்கழகத்தில் அவர் உருவாக்கிய முற்பிறவி – மறுபிறவி பற்றி ஆய்வு செய்யும் ஆராய்ச்சித்துறை இன்றளவும் மிகச் சிறப்பாகச் செயல்பட்டு வருகிறது.

பர்மாவில் டாக்டர் ஸ்டீவன்சன்

தனது ஆராய்ச்சிக்காக அமெரிக்கா, ஜப்பான், சீனா, பர்மா, இலங்கை என உலகின் பல பகுதிகளுக்கும் சென்றவர், இந்தியாவிற்கும் வந்து இச் சம்பவங்கள் பற்றி ஆராய்ந்து கூறியுள்ளார். தமிழகத்திற்கும் வருகை புரிந்துள்ளார்.

டாக்டர் இயான் ஸ்டீவன்சன் ஆராய்ச்சி செய்துள்ள சம்பவங்களிலிருந்து ஒன்றைப் பார்ப்போம்.

இப்ராஹிமின் மறுபிறவி
லெபனான் நாட்டில் உள்ள கோர்னெல் என்னும் வசித்து வந்தான் இமத் இலவர் எனும் சிறுவன். அவனுக்கு இரண்டு வயதாக இருக்கும் போதே சம்பந்தமில்லாத பல பெயர்களை உச்சரிக்கத் தொடங்கினான். பெற்றோர்கள் குழந்தை ஏதோ வேடிக்கையாகப் பேசுகிறது என பேசாமல் இருந்து விட்டனர். ஆனால் அவன் வளர வளர அவனது நடவடிக்கைகள் மிக வித்தியாசமாக இருந்தன. ஜமீலா என்ற பெயரையும், மஹ்மூத் என்ற பெயரையும் அடிக்கடி உச்சரித்தான். ஒருமுறை தெருவில் ஒரு வயதான பெரியவர் நடந்து சென்று கொண்டிருந்த போது, அவர் முற்பிறவியில் தனது வீட்டிற்கு அருகாமையில் வசித்தவர் என அடையாளம் கண்டு கொண்டு அவரைப் பின் தொடர்ந்து செல்ல ஆரம்பித்தான். பின்னர் வலுக்கட்டாயமாக அவனது குடும்பத்தாரால் வீட்டிற்குத் தூக்கி வரப்பட்டான்.

வயது ஆக ஆக தனக்கு ஏற்கனவே திருமணம் ஆகி விட்டது என்றும், இரண்டு குழந்தைகள் இருக்கின்றனர் என்றும் அவன் சொல்ல ஆரம்பித்தான். தனது பெயர் இப்ராஹிம் என்றும் தான் வசித்த நகரத்தின் பெயர் க்ரீபீ என்றும் கூறியவன், 1949 ஆம் ஆண்டு, டி.பி.நோயால் தான் இறந்து விட்டதாகவும், தனது மனைவி, குழந்தைகளைப் பார்க்க உடனே தன் கிராமத்துக்குப் போக வேண்டும் என்றும் அழுது அடம் பிடிக்க ஆரம்பித்தான்.

இந்தச் சம்பவங்கள் அவன் பெற்றோருக்கு மட்டுமல்லாது அவன் வசித்த கிராமத்துவாசிகளுக்கும் மிகுந்த வியப்பைத் தந்தது. தகவல், முற்பிறவி- மறுபிறவி பற்றி ஆய்வு செய்யும் டாக்டர் இயான் ஸ்டீவன்சன் கவனத்துக்குச் சென்றது. அவர் உடன் புறப்பட்டு கோர்னெல் வந்து சேர்ந்தார். சிறுவனுடன் பேசி அவன் கூறும் தகவல்கள் அனைத்தையும் ஒரு குறிப்பேட்டில் குறித்துக் கொண்டார்.அவர் மேலும் ஆய்வு செய்யத் தொடங்கிய போது அந்த ஊருக்கு சுமார் 25 மைல் தொலைவில் ’க்ரீபீ’ என்ற கிராமம் இருப்பதை அறிந்து கொண்டார். பின் தனது ஆய்வைத் தொடர்வதற்காக சிறுவன் மற்றும் அவன் பெற்றோருடன் ’க்ரீபீ’ கிராமத்தை நோக்கிக் காரில் புறப்பட்டார். வழியிலேயே மிக அதிகமாக முற்பிறவியின் தாக்கத்திற்கு உட்பட்ட சிறுவன் இமத், தான் வசித்த வீடுபற்றி, கெர்மில் என்ற பெயர் கொண்ட தனது மனைவி பற்றி, தன்  குழந்தைகள் பற்றி என ஒவ்வொன்றைப் பற்றியும் விரிவாகக் கூற ஆரம்பித்தான். கிராமத்தை அடைந்ததும் தன் வீட்டை சரியாக அடையாளம் காட்டியதுடன், வயதான தன் மனைவி மற்றும் குழந்தைகளையும் அடையாளம் கண்டு கொண்டான். தன்னுடைய புகைப்படத்தையும், தன்னுடைய சகோதரன் புகைப்படத்தையும் மிகத் தெளிவாக அடையாளம் காட்டினான்.

தன்னோடு முற்பிறவியில் ராணுவத்தில் பணியாற்றிய நண்பரைச் சந்தித்து பழைய அனுபவங்களைப் பற்றிப் பேசினான். அது மட்டுமல்லாமல் தன்னுடைய முற்பிறவி மாமா, நண்பன் மஹ்மூத், தனக்கு மிகவும் விருப்பமான, நெருக்கமான தொடர்பில் இருந்த விலைமாது ஜமீலா என அனைவரையும் அவனால் அடையாளம் கண்டு கொண்டு பேச முடிந்தது.

இவ்வாறு சிறுவன் இமத் தனது முற்பிறவி பற்றிக் கூறிய  57 கருத்துக்களில் 51 கருத்துக்கள் மிக மிகச் சரியாக இருந்தது என்றும், மீதி ஆறும் அவன் சிறுவன் என்பதால் அவனால் சரியாக விளக்கிச் சொல்ல முடியாமல் ஏற்பட்ட கருத்துப் பிழைகளே என்றும் கூறுகிறார் டாக்டர் இயான் ஸ்டீவன்சன். இரண்டு குடும்பத்தினரும் ஒருவரையொருவர் அது வரை சந்தித்ததில்லை, ஒருவரைப் பற்றி மற்றொருவர் கேள்விப்பட்டதுமில்லை. அப்படியிருக்க சிறுவன் இமத், இப்ராஹிமாகிய தனது முற்பிறவியைப் பற்றி விளக்கிக் கூறி, தெள்ளத் தெளிவாகத் தான் தான், அவனது மறுபிறவி என்பதை நிரூபித்திருக்கிறான் என்று தனது நூலில் குறிப்பிட்டிருக்கிறார் டாக்டர் இயான் ஸ்டீவன்சன்.

இந்தியாவில் ஸ்டீவன்சன்

வெளிநாடுகளில் மட்டும் தான் என்பதல்ல; இந்தியாவிலும் பல்வேறு மறுபிறவிச் சம்பவங்கள் நிகழ்ந்துள்ளன. முற்பிறவி-மறுபிறவிகள் பற்றி ஆராய்வதற்காக, இந்தியாவில், பரிதாபாத் நகரத்தில் Reincarnation Research Foundation என்ற அமைப்பு செயல்பட்டு வருகிறது. பெங்களூரில் உள்ள National Institute of Mental Health & Neurosciences (NIMHANS) அமைப்பும் முற்பிறவி-மறுபிறவி உண்மைகள் பற்றி ஆய்வு நடத்தி வருகிறது. அது பற்றி விரிவான பல ஆய்வுகளை மேற் கொண்டிருக்கிறது. டாக்டர் இயான் ஸ்டீவன்சனும் இந்தியாவிற்கு வருகை தந்து பல ஆய்வுகளை மேற்கொண்டிருக்கிறார். அவருடன் இணைந்து நிம்ஹான்ஸின் (NIMHANS) Clinical Psychology துறைத் தலைவர், பேராசிரியர் டாக்டர் சத்வந்த் பஸ்ரிச்சா அவர்களும் பல்வேறு ஆய்வுகளை மேற்கொண்டுள்ளார். அப்படிப்பட்ட ஒரு சம்பவத்தைப் பின்னர் பார்ப்போம்.

இன்று வள்ளலாரின் அவதார தினம்.
                                   
     “அருட்பெருஞ் ஜோதி; அருட்பெருஞ் ஜோதி
      தனிப்பெருங் கருணை; அருட்பெருஞ் ஜோதி”

என்ற மகா மந்திரத்தை உலகம் உய்ய அருளிய மாண்பாளரின் மகா அவதார தினம். கருவிலே திருவுடையவராய்த் தோன்றிய இந்த மகாபுருஷர் துறவி, சித்தர், யோகி, ஞானி என எல்லா நிலைகளையும் கடந்து தன்னுடலையே ஒளியுடம்பாக ஆக்கிக் கொண்டு இறைவனோடு இரண்டறக் கலந்தவர்.

சிதம்பரத்தை அடுத்துள்ள மருதூரில் இராமையாப் பிள்ளை – சின்னம்மை தம்பதியினருக்கு 5-10-1823ல் மகவாகத் தோன்றியவர் ஸ்ரீ ராமலிங்க அடிகள். தந்தை இளம் வயதில் இறந்ததால் சகோதரர் சபாபதிப் பிள்ளையின் ஆதரவில் சென்னையில் வந்து வசித்தார். இளமையிலேயே கருவிலே திருவுடையவராக விளங்கிய குழந்தை வளர வளர தெய்வக் குழந்தையாக பரிணமித்தது. தெய்வத்தின் அருள் பெற்றதாக வளர்ந்தது. பள்ளி செல்லும் வருவத்திலேயே அவருக்கு ஞானம் முகிழ்த்தது. ஓதாது அனைத்தையும் உணர்ந்து கொண்ட மெய்ஞ் ஞானக் குழந்தையாய் வளர்ந்தது.

வள்ளலார்

இளம் வயதில் ஆசிரியர் ’ஓதாமல் ஒருநாளும் இருக்க வேண்டாம்; ஒருவரையும் பொல்லாங்குச் செல்ல வேண்டாம்’ என உலக நீதிப் பாடலைப் பாட, அதைக் கேட்ட சிறுவன் இராமலிங்கம், அங்ஙனம் எதிர்மறையாக எண்ணங்களை பிஞ்சு எண்ணங்களில் பதியச் செய்வது தவறு என்று கூறிப் பாடிய பாடல் அவர் ஒரு ஞானக் குழந்தை என்பதை உலகுக்கு அறிவித்தது.

  ஒருமையுடன் நினது திரு மலரடி நினைக்கின்ற
   உத்தமர் தம் உறவு வேண்டும்
  உள்ளொன்று வைத்துப் புறம்பொன்று பேசுவார்
   உறவு கலவாமை வேண்டும்
  பெருமை பெறு நினது புகழ் பேச வேண்டும்
   பொய்மை பேசாது இருக்க வேண்டும்
  பெரு நெறி பிடித்தொழுக வேண்டும்
   மதமான பேய் பிடியாதிருக்க வேண்டும்
  மருவு பெண்ணாசையை மறக்கவே வேண்டும்
   உனை மறவாதிருக்க வேண்டும்
  மதி வேண்டும்; நின் கருணை நிதி வேண்டும்
   நோயற்ற வாழ்வில் நான் வாழ வேண்டும்
  தரும மிகு சென்னையில் கந்த கோட்டத்துள் வளர்
   தலமோங்கு கந்த வேளே
  தண்முகத் துய்யமணி உண்முகச் சைவ மணி
   சண்முகத் தெய்வமணியே! சண்முகத் தெய்வமணியே!

என்ற பாடலை ஆசிரியர் மெச்சினாலும், ராமலிங்கர் படிப்பில் ஆர்வம் இல்லாது இருப்பதும், அங்கும் இங்கும் சுற்றிக் கொண்டிருப்பதையும் கண்டு அண்ணன் சபாபதிப் பிள்ளையிடம் முறையிட்டார். அண்ணன் தம்பியைக் கண்டித்தார். வீட்டில் இருந்தே படிக்க ஏற்பாடு செய்தார். மாடியறையில் தனியிடம் ஒதுக்கிக் கொடுத்தார்.

அவ்வறையில் தினம்தோறும் படிப்பதற்குப் பதிலாக தியானம் எய்து கொண்டிருந்த ராமலிங்கருக்கு ஒருநாள் முருகனின் அருட்காட்சி கிடைத்தது.

“சீர்கொண்ட தெய்வ வதனங்கள் ஆறும் திகழ்கடப்பந்
தார்கொண்ட பன்னிரு தோள்களும் தாமரைத் தாள்களும்ஓர்
கூர்கொண்ட வேலும் மயிலும்நற் கோழிக் கொடியும்அருட்
கார்கொண்ட வண்மைத் தணிகா சலமும்என் கண்ணுற்றதே!” என்று அந் நிகழ்வைப் பாடினார்.

அண்ணன் தம்பியை ஒரு சாதாரணக் குழந்தையாகவே எண்ணியிருந்தார். ஆனால் ஒரு சொற்பொழிவுக்கு தமக்குப் பதிலாக அவர் செல்ல நேர்ந்ததையும், அது கேட்டு மக்கள் புகழ்வதையும் எண்ணி தம்பியின் திறம் கண்டு மகிழ்ந்தார். ஒருநாள் ராமலிங்கரின் சொற்பொழிவையும் அவர் கேட்க நேர்ந்தது. அவர் தெய்வக் குழந்தை என்பதையும், ஒரு அவதார புருடர் என்பதையும் உணர்ந்து கொண்டார். வள்ளலை வாயாரப் போற்றினார்.

வள்ளலாரின் வாழ்க்கையில் இறையருளால் பல்வேறு அற்புதங்கள் நிகழ ஆரம்பித்தன. ஒருநாள் பசித்திருந்த போழ்து அன்னை வடிவாம்பிகையே அவருக்கு அக்காள் உருவத்தில் வந்து அமுதூட்டினார்.

சத்ய ஞான சபை

சென்னையின் பொய்மை வாழ்க்கை கண்டு அஞ்சிய வள்ளலார் சில வருடங்களில் சென்னையை விட்டு நீங்கி மருதூர், கடலூர், வடலூர் போன்ற இடங்களுக்குச் சென்று தங்க ஆரம்பித்தார். இறைவனின் மீது ’திருவருட்பா’ என்னும் தெய்வீகப் பாமாலைகளைப் புனைந்தார். வடலூரில் சமரச சன்மார்க்கச் சங்கத்தையும், சத்தியத் தருமச் சாலையையும் நிறுவினார்.

”வாழையடி வாழைஎன வந்ததிருக் கூட்ட
 மரபினில்யான் ஒருவன்அன்றோ வகைஅறியேன் இந்த
ஏழைபடும் பாடுனக்குந் திருவுளச்சம் மதமோ
 இதுதகுமோ இதுமுறையோ இதுதருமந் தானோ?”

என்றெல்லாம் ஏழைகளின் நிலை கண்டு இரங்கினார். எல்லா மக்களையும் சமரச சன்மார்க்க சங்கத்தில் சேர்ந்து உய்யுமாறு அழைத்தார்.

சித்தி வளாக மாளிகை

தாம் உருவாக்கிய சித்தி வளாகத் திருமாளிகையில் பல்வேறு அற்புதங்களைப் புரிந்தார்.

ஒரு நாள்…  மறுநாள் சமைப்பதற்கான அரிசி முதலிய பொருட்கள் இல்லாமல் போய் விட்டன. வரும் அதிதிகளுக்கு எங்ஙனம் பசியாற்றுவது என பணியாளர்கள் அஞ்சினர். பின்னர் தயக்கத்துடன்  அடிகளாரிடம் தகவல் தெரிவித்தனர். அதனைக் கேட்ட  அடிகளார் தனியறைக்குச் சென்று தியானத்தில் ஆழ்ந்தார். பின் சிறிது நேரம் சென்று திரும்பி வந்தவர், பணியாளர்களை நோக்கி “கவலை வேண்டாம். தேவையான பொருட்கள் அனைத்தும் நாளையே வந்து சேரும்” என்று கூறினார்.

பணியாளர்களுக்கோ ஒன்றும் புரியவில்லை. “எப்படி வரும், எங்கிருந்து வரும், யார் மூலம் வரும்?” என்று தங்களுக்குள் விவாதித்துக் கொண்டிருந்தனர்.

வள்ளலார் மறைந்த அறை

 மறு நாள் பொழுது புலர்ந்து, பணியாளர்கள் வெளியே சென்று பார்த்த பொழுது  மூன்று வண்டிகள் நின்று கொண்டிருந்தன. அதில் முழுவதும் மூட்டை மூட்டையாய் அரிசிகள், இன்ன பிற உணவுச் சாமான்கள் அடுக்கி வைக்கப்பட்டிருந்தன.

பணியாளர்கள் ஆச்சர்யத்துடன் அதனைக் கொண்டு வந்தவரிடம் கேட்ட பொழுது, அவர், தான் பக்கத்தில் உள்ள திருத்துறையூரில் இருந்து வருதாகவும்,  முந்தைய நாள், அடிகளார் தன் கனவில் வந்து அரிசி முதலிய உணவுப் பொருட்கள் வேண்டுமென்று கேட்டதாகவும், அவ்வாறே அவர் கனவில் இட்ட கட்டளைப்படியே தான் அங்கு அந்தப் பொருட்களைக் கொண்டு வந்திருப்பதாகவும் பணிவுடன் தெரிவித்தார்.

அடிகளாரின் அற்புத ஆற்றலை எண்ணி ஆச்சரியப்பட்டனர் பணியாளர்கள்.

ஜோதி தரிசனம்

ஒருமுறை சில பக்தர்கள் ஒரு  புகைப்படக்காரரை சென்னையிலிருந்து  அழைத்துவந்தனர். அவர்களின் நோக்கம் எப்படியாவது வள்ளலாரைப் புகைப்படம் பிடித்து, அதனைத் தாங்கள் வைத்து வழிபட வேண்டும் என்பதே. வள்ளலார் இதற்கு உடன்படாத பொழுதும் அவர்கள் தங்கள் முயற்சியில் தளராது,  அவரைப் பல முறை படம் பிடித்தனர். ஆனால் அந்தப் புகைப்படத்தில் வள்ளலாரின் வெண்மையான ஆடை மட்டுமே விழுந்திருந்தது. வள்ளலாரின் உருவம் விழவில்லை. பல முறை முயற்சி செய்தும் இதே நிலை தான். இறுதியில் அன்பர்கள் வள்ளலாரைப் புகைப்படம் எடுக்கும் முயற்சியைக் கைவிட்டனர்.  அந்த அளவிற்கு ஒளியுடல் பெற்றவராக வள்ளலார் திகழ்ந்தார்.

இவ்வாறு உலக உயிர்களுக்காக இரங்கி, வாடிய பயிர்களுக்காக வாடி தன்னலம் கருதாது தொண்டு புரிந்து வந்தார் அடிகளார். ஆனால் மக்கள் யாரும் இவர் தம் பெருமையை முழுமையாக உணரவில்லை. அவர் தம் கொள்கைகளையும் சரியாகப் பின்பற்றவில்லை. அது கண்டு வள்ளலார் வருந்தினார். ‘கடை விரித்தேன் கொள்வாரில்லை. கட்டி விட்டோம்’ என்று அந்த வருத்தம் வாக்காக வெளிப்பட்டது.

ஸ்ரீ முக ஆண்டு. (1874) தை மாதம் 19 ஆம் நாள் வெள்ளிக் கிழமை. ஜனவரி மாதம் முப்பதாம் தேதி. இரவு மணி பனிரெண்டு. வள்ளலார் அன்பர்களை அழைத்தார்.  “நான் உள்ளே பத்து பதினைந்து தினங்கள் இருக்கப் போகிறேன். பார்த்து அவநம்பிக்கை அடையாதீர்கள். ஒருக்கால் பார்க்க நேர்ந்து பார்த்தால், யாருக்கும் தோன்றாது வெறும் வீடாகத் தான் இருக்கும்படி ஆண்டவர் செய்விப்பார். என்னைக் காட்டிக் கொடார்” என்று  அறிவித்தார். பின்…
” பிச்சுலக மெச்சப் பிதற்றுகின்ற பேதையனேன்
இச்சையெலாம் எய்த விசைத்தருளிச் செய்தனையே
அச்சமெலாந் தீர்ந்தேன் அருளமுதம் உண்கின்றேன்
நிச்சலும் பேரானந்த நித்திரை செய்கின்றேனே!”

- என்று பாடிக்கொண்டே, சித்தி வளாகத் திருமாளிகைக்குள் நுழைந்தார். கதவைச் சாத்திக் கொண்டார். அதன் பின் அன்பர்கள் அனைவரும் அடிகளாரின் உத்தரவுப்படி அறைக் கதவைச் சில நாட்கள் திறக்காமலே இருந்தனர்.  பின் அரசாங்கத்தின் உத்தரவுப்படி  மாவட்ட ஆட்சியாளர், தாசில்தார், காவல் துறைத் தலைவர் ஆகியோர் பூட்டியிருந்த கதவைத் திறக்க ஏற்பாடு செய்தனர். உள்ளே வெறும் வெற்றிடம் மட்டுமே இருந்தது. வள்ளலாரைக் காணவில்லை. பூட்டிய கதவு பூட்டிய படி இருக்க வள்ளலார் மாயமாக மறைந்து விட்டார்.

வள்ளலார் தமது உடலை ‘ஞான தேகம்’ ஆக்கிக் கொண்டு காற்றோடு காற்றாய், இயற்கையோடு இயற்கையாய்க் கலந்து விட்டார். தன் உடலை ஒளியுடல் ஆக்கிக் கொண்டு, எல்லாம் வல்ல பேரருள் ஒளியொடு, அருட்பெருஞ் ஜோதி ஆண்டவரோடு, ஒன்றோடு, ஒன்றாகக் கலந்து விட்டார்.

வள்ளலார் மறைந்திருக்கலாம். ஆனால் அவரது சமரச சன்மார்க்க, சமத்துவ, சமுதாயக் கொள்கைகள் மறைந்துவிடவில்லை. அவை இன்னமும் தனது கருத்தினை, சீர்திருத்தக் கொள்கைகளை இந்த உலகிற்குப் பறைசாற்றிக் கொண்டுதான் இருக்கின்றன.

எளியோரை வாழ்விக்க வந்த வள்ளலின் பாதம் பணிவோம். வளம் பல பெறுவோம்.