ஜோதிடக் கேள்வி – பதில்கள் – இறுதிப்பகுதி

 

இதை முதல்ல படிங்க…

 

கே: போலி ஜோதிடர்கள் குறித்து…

இன்றைய காலகட்டத்தில் எல்லாவற்றிலும் போலிகள் ஊடுருவி உள்ளனர். ஜோதிடமும் அதற்கு விதிவிலக்கில்லை. போலிகளைத் தரம் பிரித்து அறியமுடியாத நிலைதான் தற்போது நிலவுகிறது. அதற்காக ஜோதிடம் முழுவதுமே பிதற்றல் என்பது மதியீனம். எந்தவித ஆய்வுகளும் செய்யாமல், இருந்த இடத்தில் இருந்து கொண்டே மொத்த அனைத்தையுமே போலி என்பதில் எந்த உண்மையும் இல்லை. அப்படி அனைத்தையுமே போலி என்பது உண்மையான தேடல் உள்ள மனிதரின் கருத்தாகாது..

பாலுக்கும் கள்ளுக்கும் வேறுபாடு அறியாத, அதை சீர்தூக்கிப் பார்த்து அறிந்து கொள்ளும் தெளிவில்லாதவர்களாகத் தான் இங்கே பலர் உள்ளனர். எந்த ஒரு ஆராய்ச்சி அறிவும் இல்லாமல் கண்மூடித்தனமாக எதையும் ஏற்றுக் கொள்வது அல்லது முற்றிலுமாக மறுத்து நிராகரிப்பதே பலரது செயல்பாடாக உள்ளது. பகுத்தறிவு என்பதன் உண்மையான பொருள் தெரியாத இவர்களைக் கண்டு பரிதாபப்படுவதைத் தவிர வேறு வழியில்லை. மேலும் முன் முடிவுகளோடு எந்த ஒரு கருத்தியலையும் அணுகினால், அது நமது கொள்கைகளுக்கு ஏற்பாக இல்லை என்றால் மழுப்பலாகவும், சொதப்பலாகவும்தான் தோன்றும். ஆகவே நிஷ்காம்யமாக, எந்த வித முன் முடிவுகளும் இல்லாமல் ஜோதிடத்தை ஆராய்ந்தால் அது உண்மையா அல்லது பொய்யா என்பது புலப்படும்.

ஜோதிடத்தை உண்மை என்பவர்களும் சரி, இல்லை, அது முழுக்க முழுக்கப் பொய், ஏமாற்று வேலை என்பவர்களும் சரி, சற்று ஆராய்ந்து பார்த்தால் உண்மை என்ன்னவென்பது விளங்கும்.

கம்யூனிஸச் சிந்தனையாளரும், பெரியாரின் கொள்கைகளில் பெருத்த ஈடுபாடும் கொண்டவரான நடிகர் ராஜேஷ் இப்படித்தான் எந்த முன் முடிவுகளுமற்று, இந்த ஜோதிடத்தில் அப்படி என்னதான் இருக்கிறது என்று ஆராயப் புகுந்தார். அவரது பல்லாண்டு கால ஆராய்ச்சியை இதோ, இப்போது பிரபல ’ராணி’ வார இதழில் அனுபவக் குறிப்புகளாக எழுதிக் கொண்டு வருகிறார்.

அதே சமயம் ஜோதிடத்தின் பெயராலும், மகரிஷிகளின், முனிவர்களின், சித்தர்களின் பெயராலும் தம்மை நாடி வருபவர்களை ஏமாற்றுபவர்கள், அவர்களுக்கு தவறான வழியைக் காண்பிப்பவர்கள், திசை திருப்புபவர்கள், பரிகாரங்கள் என்று சொல்லிப் பணத்தைக் கொள்ளையடிப்பவர்கள் மிகக் கடுமையாகத் தண்டிக்கப்பட வேண்டியவர்கள். அவர்கள் மனிதர்களை ஏமாற்றினாலும் காலம் அவர்களைச் சும்மா விடாது.  எந்த நவக்கிரஹங்களின் பெயரைச் சொல்லி அவர்கள் ஏமாற்றுகிறார்களோ அதே நவ கோள்களினாலே அவர்கள் நாசமடைவர். இது சத்தியம்.  உண்மை.

நல்லது செய்தல் ஆற்றீர் ஆயினும் அல்லது செய்தல் ஓம்புமின் என்பது இதற்கும் பொருந்தும்

தமிழ்த் தென்றல் திரு.வி.க அவர்களின் மேற்கோளோடு இந்தக் கட்டுரையை நிறைவு செய்கிறேன்.

“சோதிடத்தைப் படிக்கலாம், ஆராயலாம். அது வருங்கால நிகழ்வுகளை உணர்த்தி, விளைவுகளை வெல்லக் கடவுளை அடையுமாறு அறிவு கொளுத்துவது” – திரு,வி,க,, வாழ்க்கைக் குறிப்புகள்.

ஆம். நம்புபவரோ, நம்பாதவரோ அப்படி என்னதான் இந்த ஜோதிடத்தில் இருக்கிறது என்று ஆராய்ந்து பாருங்களேன்! அது கடவுளை நோக்கிய பாதையில் ஏதோ ஒரு விதத்தில் அழைத்துச் சென்று விடும் என்பது உண்மை.

இதுவரை இதை அறுவை என்றெண்ணியும் எண்ணாமலும் பொறுமையாகப் படித்த நண்பர்கள் அனைவருக்கும் மிக்க நன்றி!

About these ads